Samadhan National Daily

      अतिगरिब १६ हजारको निशुल्क स्वास्थ्य बिमा

      तनहुँ, २५ पौष:

      सामाजिक स्वास्थ्य सुरक्षा विकास समिति तनहँुले जिल्लाका ४ हजार ६ सय १६ गरिब परिवारका १६ हजारको निशुल्क स्वास्थ्य बिमा गर्ने भएको छ ।

      गरिबी तथा सहकारी निवारण मन्त्रालयले गरेको गरिब घरपरिवार पहिचान सर्वेक्षण २०७० मा आधारित गरिब घरपरिवारको सूचीमा रहेका ‘अति गरिब’ परिवारको सरकारले नै योगदान रकम (प्रिमियम) बेर्होने गरी स्वास्थ्य बिमा गर्न लागिएको हो ।

      तनहुँ जिल्लामा २०७३ माघ अन्तिम हप्ताबाट जिल्ला कार्यालयले गतिविधि सञ्चालन गरेको थियो । २०७४ असार १ बाट दर्ता प्रारम्भ भई हालसम्ममा १५ हजार ८ सय जनाले बिमा गरेका छन् । तीमध्ये ४ हजार ५ सय बिमितले सेवा लिइसकेको सामाजिक स्वास्थ्य सुरक्षा विकास समिति तनहुँका प्रबन्धक तुल्सी पोखरेलले जानकारी दिए ।

      कार्यक्रमलाई समुदायस्तरसम्म लगेर सामुदायिक सचेतीकरणमार्फत बिमा दर्ता गराउन ९४ जना दर्ता सहयोगीहरु परिचालन गरिएको छ । कार्यक्रममार्फत उपचार सेवा लिन प्रथम सेवा बिन्दु रोज्नुपर्ने हुन्छ ।

      तनहुँको हकमा दमौली अस्पताल, बन्दीपुर अस्पताल, भीमाद प्राथमिक स्वास्थ्य केन्द्र, पुरान्डी प्राथमिक स्वास्थ्य केन्द्र र जिपी कोइराला श्वासप्रश्वास केन्द्र बेलचौतारालाई रोज्न सकिने छ । जिल्लाका सीमावार्ती क्षेत्रका बासिन्दालाई उल्लेखित स्वास्थ्य संस्था पायक पर्ने कुरालाई दृष्टिगत गर्दै देवघाट र आँबुखैरेनीको पूर्वी भागका बासिन्दाले भरतपुर अस्पताल, भानु नगरपालिकाको उत्तरी भेगका लागि सुन्दरबजार अस्पताल र शुक्लागण्डकी नगरपालिकाको पश्चिमी क्षेत्रका बासिन्दाले पश्चिमाञ्चल क्षेत्रीय अस्पतालसमेत रोज्न पाउने व्यवस्था गरिएको छ ।

      जिल्लाभित्रका स्वास्थ्य संस्थाहरुबाट हालसम्म ३ हजार ४ सयजना बिमितले सेवा लिइसकेका छन् । सेवा प्रदायकहरुलाई १७ लाखभन्दा बढी रकम भुक्तानी गरिएको पोखरेलले जानकारी दिए ।

      के हो स्वास्थ्य बिमा ?

      स्वास्थ्य बिमा कार्यक्रम स्वास्थ्य सेवा उपयोगको क्रममा हुने अनियोजित खर्चको जोखिमलाई अग्रिम व्यवस्थापन गर्दै वित्तीय संरक्षण प्रदान गर्ने अवधारणा हो । यो कार्यक्रम परिवारको योगदानमा आधारित छ ।

      सहभागी हुन प्रति ५ जनासम्मको परिवारले वार्षिक २५०० रुपैयाँ योगदान (प्रिमियम) रकम र परिवारमा ५ जनाभन्दा बढी सदस्यभएप्रति सदस्य ४२५ का दरले थप रकम बुझाउनु पर्नेछ । सुविधाको थैलीको सीमा पाँचजना परिवारको हकमा वार्षिक ५० हजार रुपैयाँ छ ।

      पाँच जनाभन्दा बढी परिवारका सदस्य भएमा प्रतिथप सदस्य वापत १० हजारको दरले सीमा बढ्दै जान्छ र यसको अधिकतम सीमा १ लाख रहन्छ । बिमित सदस्यहरुले वर्षमा १ पटक योगदान रकम बुझाएपछि सेवा क्रियाशील भए पश्चात क्यास लेस प्रणालीमा वर्षभरि सुविधा थैलीको सीमा अनुसार उपचार गर्ने पद्दति मिलाइएको छ ।

      बीमित सदस्यले स्वास्थ्य सेवा सूचीकृत सरकारी स्वास्थ्य संस्थाबाट प्राप्त गर्नुका साथै समितिले तोकेको आधारमा निजी क्षेत्रका अस्पताल र शिक्षण अस्पतालबाट पनि सेवा पाउने व्यवस्था छ । स्थानीय स्तरका अस्पतालबाट सुविधा प्राप्त नभएमा प्रेषणको व्यवस्था छ जसले गर्दा विशिष्ट प्रकृतिको सेवा पाउने अवस्था छ ।

      कार्यक्रममा ५ सय ३० प्रकारका औषधी समेटेकोमा २०७४ भाद्र १ बाट ९ सय २८ पु¥याइएको छ । वार्षिक रुपमा नवीकरण गर्नुपर्नेछ । नवीकरण गरे स्वास्थ्य सेवा अनवरत पाउने व्यवस्था छ ।


      प्रतिकृया दिनुहोस्