Samadhan National Daily

      गन्तव्यः पुरानाे इतिहास सम्झाउने ‘पुरानाेकाेट’

      लमजुङ, २ बैशाख:

      लमजुङको पुरानोकोट ऐतिहासिक थलो । चौबीसे राज्यको एउटा राज्य थियो लमजुङ । इतिहास अनुसार कालु शाह लमजुङका राजा भएका थिए ।

      लमजुङेले कास्कीबाट राजा कुलमण्डनका माइला छोरा कालुलाई ल्याएर तुर्लुङकोटमा राजा बनाएका थिए । पछि तुलुङकोटबाट दरबार पुरानोकोट सारियो । पुरानोकोटमा भग्नाबशेष छन् ।

      कालुको हत्यापछि उनकै भाइ यशोब्रह्मलाई कास्की बाट ल्याएर पुरानोकोट गद्दीमा बसाइयो । उनले गाउँसहर र बेसीसहरमा दरबार बनाए । पुरानोकोट गढी मुन्तिर पुरानोकोट गाउँ छ ।

      बेसिसहर नगरपालिका–४ पुरानोकोटमा ११६ घर धुरी छन् । ती मध्ये ५ घर दलितका, बाँकी गुरुङ । च्वाइस नेपालको सहयोगमा ०६८ सालदेखि गाउँमा होमस्टे गराउन थालियो । अचेल गुरुङका १२ घरमा होमस्टे गराइन्छ ।

      पुरानोकोटबाट एक घन्टामा गढी पुगिन्छ जहाा जलदेवी, राजारानीको दरबारका भग्नावशेष र सेना परेड खेल्ने मैदान छ । गढी क्षेत्र र गाँउको छेउबाट हिमाल दर्शन गर्न पाइन्छ ।

      माछापुच्छ्रे, अन्नपुर्ण, लमजुङ, पिक २९, गंगापूर्ण, मनास्लुदेखि बुद्धसम्म डेढ दर्जनभन्दा बढी हिउँचुली देखिन्छ । पाहुनालाई जन्तर लगाएर स्वागत गरिन्छ । साँझ साँस्कृतिक कार्यक्रममा सोरठी नाच, स्यार्गा, चुट्का, घाटु र भेडी गोठाला नाटक देखाइन्छ ।

      कसरी पुग्नेः काठमाडौँ–बेसीसहर १७२ किमि । बेसीसहर–काउलेपानी–पुरानोकोट १७ किमि । मोटरसाइकलर जीप गाउँसम्मै पुग्छ । बेसीसहरबाट दिउँसो २ बजे पुरानोकोट जाने बस छुट्छ । बसमा २घन्टा लाग्छ । बेसीसहरबाट हिँडेर जाँदा चार घन्टा लाग्छ ।

      सम्पर्कः
      पुरानोकोट सामुदायिक होमस्टे, लमजुङ
      कन्याकाशी गुरुङ–९८४६२४८३३८
      खिन्दुरी–९८६१७१३७६७


      प्रतिकृया दिनुहोस्