Samadhan National Daily

      महेन्द्रपुल आसपासका ९६ घरको शौलालय र भान्साबाट निस्केको फोहोर सिधै सेती नदीमा मिसिने

      पाेखरा, २ जेठ:

      महेन्द्रपुलमा पोखरा महानगरले बनाएका २ वटा सार्वजनिक शौचालय छन् । एउटामा सेफ्टी टयांकी छ भने अर्कोको फोहोर सिधैं सेतीमा मिसिन्छ ।

      सेती बचाउ अभियानमा लागेका सरोकारवालाको दबाबपछि पोखरा महानगरपालिका–९ ले सेफ्टी टयांकी नभएको शौचालयमा ताल्चा लगाउनु पर्यो । ताल्चा लगाएकै २ वर्ष भइसक्यो । न त खोलिएको छ, न विकल्प नै खोजिएको छ ।

      सरोकारवालाको आलोचना र विरोधपछि वडाले साँचो लगाएको पोखरा – ९का वडा सचिव लोकदर्शन कोइरालाले बताए । उनी भन्छन्, ‘२ वटामध्ये एउटाको ताल्चा मै गएर लगाएको छु, अर्कोमा त सेफ्टी टयासेफ्टी टयांकी नै छ चिन्ता भएन ।’

      सार्वजनिक शौचालयमा ताल्चा लगाएपनि वडाले त्यस वरपर रहेका ९६ घरलाई नियन्त्रणमा ल्याउन सकेको छैन । ती सबै घरको चर्पी तथा ढलको फोहोर सेतीमै बिसर्जन हुन्छ ।

      महेन्द्रपुल नजिकै सेती किनारमा उमावती उपाध्यायको पक्की घर छ । सबै कोठा भाडामा छन् । भाडामा बस्नेले नै हेरचाह गर्छन् त्यो घर । उनको घरको शौचालयको फोहोर सिधै सेतीमा मिसिन्छ । नजिकैकी पार्वती प्रजापतीको घरको पोहोर पानीको निकास पनि सेती नदी नै भएको छ ।

      उमावती र पार्वती जस्तै त्यस वडामा भएका १ सय ४० घरमध्ये अझै पनि ९६ घरले चर्पीका लागि छुट्टै सेफ्टी खाल्डो नखनेको वडाका सचिव लोकदर्शन कोइराला स्वीकार्छन् । उनी भन्छन्, ‘केहीले हाम्रो सूचना मानेर बनाए, कसैले बनाउँदैछन्, धेरैले त अटेरी नै गरेर बनाएका छैनन् ।’

      वडाले पटकपटक माइकिङ तथा सूचना गर्दैआएको छ । वडाका सबै बासिन्दालाई भेला गरेर जनचेतना फैलाउने काम पनि भइसकेको छ । तर धेरैजसोले टेरपुच्छर लगाएका छैनन् । ‘चर्पी सफा गर्ने, सेतीमा फाल्दा के हुन्छ र नफाल्दा के हुन्छ भन्ने बारेमा सडक नाटक नै देखायौं, तर भएन,’ उनले भने ।

      स्थानीय चुनाव भएको १ वर्ष बितिसक्दा पनि वडाले सेती नदीमा जाने शौचालयको ढल तथा फोहोरलाई रोक्न नसक्दा वडाको टाउको दुखाइको विषय बनेको छ फोहोर । सञ्चार माध्यमबाट धेरैपटक सूचना प्रकाशित गर्दा पनि वडावासीले हेलचेक्रयाइँ गरेको कोइरालाको भनाइ थियो ।

      ४४ जनाको घरमा सेफ्टी टयाङ्की निर्माण भइसकेको र यसबीचमा धेरैको निर्माणाधीन अवस्था रहेकाले कतिको घरमा ट्यांकी बनिसकेको छ भन्ने यकिन नभएको उनले बताए ।

      ‘चिठी सबैलाई पठाएकै छौं, अब भने एकचोटी स्थलगत अनुगमनमा गएर डाटा संकलन गछौं,’ उनले भने । पत्रपत्रिकामा नाम किटेरै सूचना जारी गरिसकेको र अब कतिले माने कतिले नमानेका जानकारी लिन घरदैलोमा जाने उनको भनाइ छ ।

      सेफ्टी ट्यांकी खोलेका मधये पनि सबैले घरपिच्छे खोलेका भने छैनन । सेतीनदीको डिल मै घर भएकाले ३/४ घर मिलेर एउटा टयांकी बनाएको १ स्थानीयले बताए । सबै मिलेर बनाउँदा ठाउँ पनि थोरै लाग्ने र सेतीमा फोहोर पनि नजाने उनको भनाइ थियो ।

      यसरी सेती नै प्रदूषित हुनेगरी सेती नदीमा फोहोर ढल तथा चर्पीको पाइप सिधै फाल्ने घरधनीलाई भने वडाले अझैसम्म कारवाही गर्न सकेको छैन । ‘चिठी पठाउँदा यति दिनभित्र बनाउनुपर्यो भनेर भनेका छौं मान्दैनन्, के गर्नु त ?’ वडा सचिव कोइरालाले भने, ‘अहिले सामान्य रुपमा अघि बढेका छौं, एकैचोटीमा हुने कुरा होइन । होला नि विस्तारै ।’

      व्यस्त बजारको छेउँमा वस्ती भएकाले घरमा घरधनी नबस्ने र बहालमा बस्ने मात्र भएकाले सम्झाउन नसकिएको कोइरालाको भनाइ छ । ‘सबै घरभाडामा मात्र बस्ने छन्, गयो घरधनी भेटिदैनन्,’ उनले भने । घरधनी समयमै नभेटिँदा पनि सेतीनदीमा फोहोर फाल्नेलाई रोक्न नसकिएको उनले बताए ।


      प्रतिकृया दिनुहोस्