Samadhan National Daily

      विनाेद बनियाकाे ‘पार्वती’ गीतको भिडियो सार्वजनिक

      पोखरा, ८ साउन:

      पछ्यौरीको फेरोले आँसु पुछ पार्वती
      सिंगो जीवन बाँकी छ हाँस्न सिक पार्वती

      कवि तीर्थ श्रेष्ठको शब्दलाई समेटेर गायक विनोद बानियाले नयाँ गीत बजारमा ल्याएका छन् । एकल महिलामाथि तयार पारिएको यो गीतको म्युजिक भिडियो सार्वजनिक भएको छ ।

      एकल महिलालाई प्रोत्साहन तथा सम्मान बढाउने गरी बजारमा आएको भिडियो यतिबेला चर्चामा छ । हालैसालै सार्वजनिक यो गीतमा आसुँमा डुब्ने र एक्लो महसुस गर्ने होइन, हाँस्न र बाँच्नका लागि संसार ठूलो छ भन्ने भाव व्यक्त गरिएको छ ।

      हरि लम्सालको संगीत रहेको यो भिडियो यतिबेला युट्युबमा समेत मन पराइएको छ । गायक बानियाले जनजिब्रोमा झन्डिने गरी गीत गाएका छन् ।

      केही समयपछि नयाँ भिडियोसहितको गीत सार्वजनिक गरेका गायक बानिया गीत स्तरीय बनेको बताउँछन् । ‘यो एकल माहिलामाथि लेखिएको गीत हो,’ गायक बानियाले भने, ‘सबै एकल आमा र एकल महिलाहरुको समर्पणमा यो गीत तयार पारिएको हो ।’ भिडियो हेरेर भावुक भएको धेरैले प्रतिक्रिया दिएका छन् ।

      एक पटक खुसी खोसिएपछि दुखी भइरहनु पर्दैन र फेरि खुसी आउन सक्छ भन्ने भावमा गीत बनेको बताउँदै कवि तीर्थले भने, ‘गायक बानियाले गीतलाई न्याय गरेका छन् । भिडियो पनि एकल महिलाको संवेदनालाई न्याय गर्दै बनेको छ ।’ यो गीत लमजुङको भुजुङ गाउँमा देखिएको दृश्यले जन्माएको कवि श्रेष्ठले बताए ।

      कहिले देशभक्ति, खेलकुद, रोमान्टिक त कहिले प्रेम रसका गीत पस्किरहने बानियाले यसपटक पनि उस्तै फरक र मौलिक स्वादको गीत पस्किएका छन् ।

      २ दशकदेखि संगीत कर्म गरिरहेका गायक बानियाले चर्चामा रहेको ‘म त बलेनीमा’ गीतपछि यो गीत बजारमा ल्याएका हुन् । यसअघि उनको मान्छे, डाउड, प्रोफाइल एल्बम बजारमा आइसकेका छन् ।

      एसियन म्युजिकको प्रस्तुति र विभोर पोखरेलले निर्देशन गरेको भिडियोमा विकास लामिछाने, सिर्जना जिसी, अनील लामिछानेले अभिनय गरेका छन् ।


      प्रतिकृया दिनुहोस्