भोलिदेखि पोखरा मनकामना कप

समाधान संवाददाता २०७५ माघ १४ गते ७:५८

समाधान संवाददाता

खिल नेपाल फुटबल संघ (एन्फा) कास्कीको आयोजनामा छैटौँ संस्करणको ‘मनकामना केबुलकार पोखरा कप’ मंगलबारदेखि हुने सुरु हुने भएको छ । माघ २६ सम्म चल्ने उक्त प्रतियोगिता पोखरा रंगशालामा हुने आयोजकले जनाएको छ ।

प्रतियोगितामा राष्ट्रिय तथा अन्तर्राष्ट्रिय गरी १२ टिम सहभागी हुनेछन् । ‘प्रतियोगितामा ३ वटा विदेशी टिम सहभागी हुनेछन्,’ कास्की जिल्ला फुटबल संघका अध्यक्ष मिलन गुरुङले भने, ‘त्यसमा जापानको एक टिम पनि आउने पक्का भइसकेको छ ।’ ८ वटा ‘ए’ डिभिजन क्लब र आयोजक गरी १२ टिमबीच प्रतिस्पर्धा हुने अध्यक्ष गुरुङले जानकारी दिए ।

प्रतियोगितामा मनाङ मस्र्यांदी, संकटा क्लब, थ्रि स्टार क्लब, नेपाल आर्मी, नेपाल पुलिस, एपीएफ, हिमालयन शेर्पा, च्यासल क्लब, आयोजक पोखरा ११, अन्तर्राष्ट्रिय टिममा रिस्सो युनिर्भसिटी जापान, डेफिन्स टिम फेमली र क्यामरुन टिम सहभागी हुने आयोजकले जनाएको छ । ‘उद्घाटन खेल एपीएफ र हिमालयन शेर्पाबीच हुने छ,’ अध्यक्ष गुरुङले भने ।

प्रतियोगिताको विजेता टिमले ७ लाख ५५ हजार रुपैयाँ र उपविजेता टिमले नगद ४ लाख ५ हजार ५ सय ५५ रुपैयाँ र कप प्रात गर्नेछन् ।

प्रतियोगितामा उत्कृष्ट ५ विधाका खेलाडीलाई २५ हजार रुपैयाँ उत्कृष्ट खेलाडीलाई मोटरसाइकल दिइने आयोजकले जनाएको छ ।

‘लामो समय फुटबलमा योगदान दिएका एकजनालाई पनि मोटरसाइकल सहित सम्मान गर्नेछौं,’ गुरुङले भने, ‘अन्य खेलाडी र पत्रकारलाई समेत सम्मान गर्नेछौं ।’

तपाईको प्रतिक्रिया