समाधान सम्वाददाता

अघिल्लो सोमबार आएको पश्चिमी वायूको प्रणालीले देशभर कहीँ वर्षा र कहीँ भारी हिमपातपछि त्यसको प्रभाव नसकिँदै अर्को पश्चिमी वायू नेपाल पसेको थियो। त्यसले शुक्रबार र शनिबार वर्षा गराएको थियो।

त्यो प्रणाली आइतबारदेखि कमजोर भए पनि अर्को प्रणाली आइरहेकाले बुधबारदेखि फेरि पानी पर्ने सम्भावना रहेको जल तथा मौसम पूर्वानुमान महाशाखाले जनाएको छ।

‘अस्तिको प्रणालीको प्रभावले आज पनि पहाडी क्षेत्रमा बादल र केही ठाउँमा वर्षाको सम्भावना छ,’ मौसमविद् सुवास रिमालले सेतोपाटीसँग भने, ‘पर्सि नेपाल पुग्ने गरी अर्को प्रणाली आइरहेको छ। त्यो पनि कमजोर छैन। वर्षाको सम्भावना छ।’

उनका अनुसार यो प्रणाली अहिले इरानको आकाशमा आइपुगेको छ। यसपालि आएको पश्चिमी वायूको यो चौथो प्रणाली हो। पश्चिमी वायूको प्रभावले पुस २३ गते राजधानीमा यो वर्षको पहिलो हिउँदे वर्षा भएको थियो।

‘पश्चिमी वायू प्रणाली कहिले र कसरी आउँछ भन्ने एकिन हुँदैन। यसपालि लगालग आइरहेको छ,’ रिमालले भने।

नेपालमा हिउँदे वर्षा गराउने पश्चिमी वायू भूमध्य सागरदेखि आउँछ। भूमध्य सागरको माथि बन्ने यो प्रणाली सतहदेखि झन्डै पाँच किलोमिटर माथि हुन्छ।

‘निकै माथि हुने भएकाले यो प्रणाली मनसुनजस्तो बलियो हुँदैन। तर यसले उच्च क्षेत्रमा हिमपात र पहाडी क्षेत्रमा बर्खा गराउँछ,’ मौसमविद् रिमालले भने,‘मनसुन सकिनासाथ सुरू हुने यो प्रणाली मनसुन सुरू नभइउन्जेल आउन सक्छ। कुनै वर्ष धेरै आउँछ, कुनै वर्ष थोरै आउँछ। यसपालि धेरै आइरहेको छ।’