२८ करोडको सुन्तला बिक्री

समाधान संवाददाता २०७५ फागुन १ गते ८:१३

राजन उपाध्याय, दुलेगौंडा

तनहुँमा यस वर्ष २७ करोड ७५ लाख रुपैयाँको सुन्तला बिक्री भएको छ । गत वर्षको तुलनामा यस वर्ष केही प्रतिशत वृद्धि भएको कृषि ज्ञान केन्द्रले जनाएको छ । यस वर्ष ६ हजार ९ सय ३८ मेट्रिक टन सुन्तला बिक्री केन्द्रले जानकारी दिएको छ । किसानले बगानबाटै प्रतिकिलो औसत ४० रुपैयाँका दरले सुन्तला बिक्री गरेका छन् ।

गत वर्ष ६ हजार ५ सय ४६ मेट्रिक टन सुन्तला बिक्री भएको थियो । गत वर्ष करिब २६ करोड ६५ लाख रुपैयाँको विक्रि भएको कृषि ज्ञान केन्द्रका बागवानी विकास अधिकृत शंकर पौडेलले जानकारी दिए । हाल जिल्लामा १ हजार ४ सय ७७ हेक्टर क्षेत्रफलमा सुन्तलाको बगान फैलिएकोमा १ हजार २८ हेक्टर क्षेत्रफलमा लगाइएको सुन्तलाले उत्पादन दिन थालेको छ । गत वर्षको तुलनामा यो वर्ष ६ प्रतिशतले उत्पादन बढेको पौडेलले उल्लेख गरे । उचित मौसम, वातावरण, रोक कीरा नियन्त्रण र समयमै गोडमेल भएका कारण उत्पादनमा वृद्धि भएको हो ।

आँबुखैरेनी, बन्दिपुर, जामुने, पुर्कोट, देउराली, वैदी, छिपछिपे, नाम्सीकोट, भानुमति, तनहुँसुर, बेनीकोट सुन्तला उत्पादनका पकेट क्षेत्र हुन् । यहाँ उत्पादित सुन्तला अधिकांश पोखरा र काठमाडौंमा बिक्री हुने गरेको छ । बगैचामा सुन्तला सकिएसँगै कृषक गोडमेलमा व्यस्त छन् । सुन्तलालाई जेठमा औषधी उपचार र साउनमा पुनः गोडमेल गर्नुपर्ने हुन्छ ।

तपाईको प्रतिक्रिया