समाधान स‌ंवाददाता

पोखरा ३२ खुदीखोलाका सुकुम्बासी समुदायले विरोध सभा गरेका छन् । अखिल नेपाल सुकुम्बासी संघ पोखरा ३२ द्वारा आयोजित विरोध सभामा पोखरा ३२ ले आफूहरुलाई वेवास्ता गरेको आरोप लगाए । विरोध सभामा अखिल नेपाल सुकुम्बासी संघका जिल्ला अध्यक्ष हर्कमान विकले वडाले न्यायोचित व्यवहार नगरेको आरोप लगाए । उनले सुकुम्बासी समस्या समाधान गर्न वडाले पहल नगरेको भन्दै आन्दोलनमा उत्रने चेतावनी दिए ।

अखिल नेपाल सुकुम्बासी संघका केन्द्रीय सचिव अर्जुन मल्लले सुकुम्बासी बस्ती व्यवस्थापनमा छुट्याएको ३५ लाख रुपैयाँको बजेट वडा कार्यालयले अन्यत्र खर्च गरेको आरोप लगाए । सभामा अखिल नेपाल सुकुम्बासी संघका जिल्ला सचिव ओम पौडेल, विरोध सभाका संयोजक जनबहादुर घले, आराधना टोल विकास संस्था खुदीखोलाका अध्यक्ष भूपेन्द्रराना मास्की मगर, नेकपाका प्रतिनिधि श्रीप्रसाद पन्थी लगायतले बोलेका थिए ।

सभामा पोखरा ३२ का अध्यक्ष अक्कलबहादुर कार्कीले सुकुम्बासी बस्ती व्यवस्थापनका लागि भनेर आफूले ३५ लाखे बजेट नपाएको बताए । वडाध्यक्ष कार्कीले शीर्षक अनुसार खर्च गरिएकोमा आरोपको अर्थ नभएको बताए ।