जाली नोटको कारोबारी प्रहरीको जालोमा

समाधान संवाददाता २०७५ फागुन ७ गते ८:००

सुरेशराज अधिकारी

नक्कली नोट प्रयोग गर्ने २ जनालाई सोमबार वडा प्रहरी कार्यालय बगरले मालेपाटनबाट पक्राउ गरेको छ । मकवानपुर घर भई पोखरा महानगरपालिका ५ पस्र्याङ धारामार्गमा डेरा गरी बस्ने नरेश लामा र उनकी श्रीमती सरस्वती बलामीलाई प्रहरीले पक्राउ गरेको हो ।

नरेशले गत माघ २२ गते अर्मलाको १ पसलमा रिचार्ज कार्ड किनेका थिए । सोही दिनदेखि नै प्रहरीले खोजी गरिरहेको थियो ।

अर्मलाको घटनामा प्रहरीले शंका गरेपछि उनीहरु बुटवलमा गएर फेरि पोखरा आएको प्रहरी स्रोतको दाबी छ । स्रोतका अनुसार उनीहरुले बुटवलमा पनि १ लाखभन्दा बढी नक्कली नोट साटेर पोखरा आएको प्रहरीले बताएको छ ।

बुटवलबाट श्रीमतीको नाममा १ लाख सक्कली पैसा पठाएर नरेश फेरि पोखरा आएको प्रहरीलाई बयान दिएका छन् । उनीहरुले १ हजारको नोट रिचार्ज कार्ड किन्न प्रयोग गरेको प्रहरीलाई बयान दिए । अन्य १ सयसम्मको सामान किनेर उनीहरुले हजारको नक्कली नोट साट्ने गरेको प्रहरीलाई बयान दिएका छन् ।

प्रहरीका अनुसार उनीहरुले नक्कली नोट १ हजारमात्र प्रयोग गर्थे । घरमा नै मेसिनको प्रयोग गरेर नक्कली नोट छाप्ने गरेको भेटिएको हो । पोखरा, बुटवल लगायत अन्य सहरमा पनि उनीहरुले नक्कली नोटको प्रयोग गरेको प्रहरीले अनुमान गरेको छ । अहिलेसम्म उनीहरुले कति नक्कली नोटको प्रयोग गरे भन्ने यकीन भएको छैन ।

उनीहरुबाट प्रहरीले हजारको नक्कली नोट १९ थान, नक्कली नोट बनाउन प्रयोग गरिने कलर प्रिन्टर १ थान, एनसेल तथा एनटिसी रिचार्ज कार्ड ९० हजारसहित पक्राउ गरेको छ ।

ग १४ प ३५४ नम्बरको डुक मोटरसाइकल १ थान, ल्यापटप १ थान, मोबाइल २ थान र ५ सयका २ वटा भारतीय नोट भेटिएको प्रहरीले जानकारी दिएको छ । उनीहरुले पोखरामा केही समय अघिदेखि नै नक्कली नोटको प्रयोग गर्दै आएको खुलेकोे छ । नरेश डुक माेटरसाइकल चढेर काराेबारमा निस्कने प्रहरीले जनाएकाे छ ।

मुद्दा खोटा चलान अनुसार उनीहरुलाई मुद्दा चलाउने प्रहरीले जनाएको छ । उक्त मुद्दामा ५ देखि १० वर्षसम्म जेल सजाय हुनेछ । पोखरामा पछिल्लो समय नक्कली नोट छ्याप्छ्याप्ती भेटिन थालेका छन् । गत साउन यतामात्र २ सयभन्दा बढी नक्कली नोट भेटिएको राष्ट्रबैंकले जनाएको छ ।

तपाईको प्रतिक्रिया