एन्फा कास्कीको लापरवाहीः विजेता टिममात्र हैन होटलले पनि पाएन पैसा

समाधान संवाददाता २०७५ फागुन १४ गते १७:४२

समाधान संवाददाता

अखिल नेपाल फुटबल संघ कास्कीले आयोजना गरेको मनकामना केबलकार पोखरा कप विजेताले पुरस्कारबापत पाउनुपर्ने नगद नपाएको गुनासो गरेका छन् । उनीहरुले खेल सकिएको लामो समयसम्म पनि पुरस्कार दिनुको साटो उल्टै झुलाइराखेको आरोप लगाएका छन् ।

माघ २७ गते सकिएको मनकामना केबलकार पोखरा कपको फाइनलमा विदेशी टिम डफिन्स क्लब, क्यामरुनसँग विभागीय टोली एपीएफ पराजित भएको थियो । विजेता डफिन्सले ७ लाख ५५ रुपैयाँ उपविजेतामा सीमित भएको एपीएफले ४ लाख ५ हजार रुपैयाँ पाउनै बाँकी छ ।

‘खेल सकिएको केही समयपछि पाउँछौं भन्ने लागेको थियो । तर अहिलेसम्म पाएका छैनौं,’ टिम म्यानेजर अमित मल्लले समाधानसँग भने, ‘पहिले दिन्छौं दिन्छौं भन्थे । अहिले सम्पर्कमै छैनन् ।’ उनले एन्फा कास्कीका अध्यक्ष मिलन गुरुङसँग पटकपटक पुरस्कार नगदका लागि ताकेता गरिरहेको भएपनि कुनै प्रतिक्रिया नपाएको दाबी गरे ।

एपीएफ टिम म्यानेजर मल्लले आफूहरुले एन्फालाई कुनै एउटा निर्धारित गतेको चेक दिन पनि आग्रह गरिरहेको सुनाए । ‘एन्फाले जुन दिन दिन्छ । त्यही दिनको चेक काटेर दिनुस् पनि भनेका छौं । त्यसो भन्दा पनि तर्किरहेका छन्,’ उनले भने । समग्र पोखरासँग जोडिएको प्रतियोगिताले पुरस्कारबापत पाउनुपर्ने रकम पनि नपाउँदा बाहिर राम्रो सन्देश नजाने उनले बताए ।

एन्फा कास्कीले मनकामना केबलकार पोखरा कपका बेला खेलाडी राख्न प्रयोग गरेका विभिन्न होटलमा पनि पैसा बुझाउन बाँकी रहेको स्रोतले जानकारी दिएको छ । उनीहरुले लामो समयदेखि एन्फा कास्कीसँग लाखौं रकम असुल्न बाँकी भएको बुझिएको छ ।

विजेता बनेको डफिन्स क्लबले पनि पुरस्कारबापत पाउनुपर्ने नगद पाएको छैन । क्बलले एन्फा कास्कीसँग आपसी कुरा भएकाले मिडियालाई चासो नदिन बताएको छ । ‘हिजोमात्रै मिलन दाइ (एन्फा कास्की अध्यक्ष)सँग कुरा गरिसकेको छु । हाम्रो आपसी समझदारी छ,’ क्लबका सगुन मानन्धरले भने ।

एन्फा कास्कीका अध्यक्ष मिलन गुरुङले केही दिनमा सबैको रकम चुक्ता हुने जानकारी दिएका छन् । उनले भने, ‘स्पोन्सरबाट पैसा आउन बाँकी छ । त्यो पैसा आएपछि सबैलाई दिइहाल्छौं ।’ उनले मिडियाले कुरै नबुझी चिढाउने काममात्र गरिरहेको आरोप लगाए ।

तपाईको प्रतिक्रिया