समाधान संवाददाता

गैडाँको संरक्षण गरिनुपर्छ भन्दै अभियानमा जुटेका कमलजंग कुँवरको ‘गैंडालाई ४ वर्ष’ पुस्तक प्रकाशित छ । पुस्तकमा गैंडा चोरी शिकारी किन हुन्छ, चोरी भएका गैंडा कहाँ पुर्‍याइन्छन्, कसरी नियन्त्रण सम्भव भयो, अभियान केका लागि थियो भन्ने यावत् जिज्ञासाको जवाफ उनले दिएका छन् । यही अभियानको तेस्रो चरणमा सोही पुस्तकमा आधारित चलचित्र ‘खाग’ निर्माण गरिएको उनले जानकारी दिए ।

दुर्लभ वन्यजन्तु संरक्षणमा जुट्न नागरिकलाई उत्साह प्रदान गर्ने हेतुले फिल्म खाग निर्माण थालिएको उनले स्पष्ट पारे । फागुन २४ गतेदेखि प्रदर्शनमा आउन लागेको फिल्ममा मुख्य पात्रमा प्रवीण खतिवडा छन् । खतिवडाले चलचित्रमा आफ्नो चरित्रलाई मेहनतपूर्वक उतारेको पुस्तकका मुख्य पात्र कुँवरले बताए । चलचित्रलाई मनोज पण्डितले निर्देशन गरेका छन् । यसअघि पण्डितले बधशाला, दासढुंगा, ग्रेटर नेपाल लगायतका चलचित्र निर्देशन गरेका थिए । फिल्ममा प्रमिला कुँवरको लगानी छ ।