रक्सी सेवन गरी विद्यालय आउने हेडसर पक्राउ

समाधान संवाददाता २०७५ फागुन २३ गते ८:२५

सांकेतिक तस्विर
समाधान

तेज आधारभूत विद्यालयका प्रधानाध्यापक इन्द्रबहादुर मल्ललाई प्रहरीले पक्राउ गरेको छ । वालिङ नगरपालिका ८ काफलडाडाँको उक्त विद्यालयमा दिनहुँ रक्सी सेवन गरी आउने गरेपछि प्रहरीले पक्राउ गरेको हो ।

विद्यालयमा अध्यापनका लागि गएका ५० वर्षीय मल्लको अवस्था देखेपछि अभिभावकले प्रहरीलाई खबर गरेका थिए ।

विद्यालयमा रक्सी सेवन गरेरमात्रै आउने मल्लले आजित बनाएपछि बाध्य भएर प्रहरीलाई खबर गरेको विद्यालय व्यवस्थापन समिति अध्यक्ष दुर्गाप्रसाद पंगेनीले बताए ।
अभिभावकको सूचना आएपछि तत्काल गएको प्रहरी टोलीले मादक पदार्थ सेवन गरेकै अवस्थामा पक्राउ गरेको बताउँदै प्रहरी निरीक्षक शंकर आचार्यले कानुन अनुसार कारबाही गरिने स्पष्ट पारे ।

२०४१ सालबाट तेज आधारभूत विद्यालयमा अध्यापन गर्न थालेका मल्लले सधैं रक्सी सेवन गर्न थालेपछि ५ वर्ष पहिलाबाट जागिर छोड्न स्थानीयले दबाव दिएका थिए । गत माघ ४ गते अब उप्रान्त रक्सी सेवन गरी विद्यालय नआउने र सेवन गरे कारबाहीका लागि तयार रहको भन्दै कबुल गरेको अध्यक्ष पंगेनीले जानकारी दिए ।

तपाईको प्रतिक्रिया