रासस, बलेवा

प्रगतिशील लेखक सङ्घ गण्डकी प्रदेशको अध्यक्षमा लोकबहादुर थापा चयन हुनुभएको छ । शनिबार पोखरामा सम्पन्न प्रथम प्रदेश सम्मेलनले थापाको नेतृत्वमा ३५ सदस्यीय प्रगतिशील लेखक सङ्घ गण्डकी प्रदेश चयन गरेको हो । 

सङ्घको उपाध्यक्षमा परशुराम कोइराला र विजया सुवेदी, सचिवमा नारायण मरासिनी, कोषाध्यक्षमा नारायण श्रेष्ठ र सहसचिवमा दिनेश शर्मा चयन हुनुभएको छ । गण्डकी प्रदेशका ११ जिल्ला अध्यक्ष पदेन सदस्य रहने गरी बाँकी २९ सदस्य चयन भएको निर्वाचन समितिका संयोजक प्रा डा रविलाल अधिकारीले जानकारी दिनुभयो । 

सम्मेलनमा गण्डकी प्रदेशका मनाङ र मुस्ताङ बाहेकका नौ जिल्लाका प्रगतिशील लेखकको सहभागिता रहेको थियो । प्रथम सम्मेलनलाई सम्बोधन गर्दै सङ्घका केन्द्रीय अध्यक्ष मातृका पोखरेलले लेखकले देशको शासन व्यवस्थालाई सुधार गर्न सक्ने भन्दै सत्ताको विपक्षमा रहेर कमीकमजोरीको विषयमा खबरदारी गर्न आग्रह गर्नुभयो ।