समाधान संवाददाता

नेपाली कांग्रेसका सभापति शेरबहादुर देउवाले नेपाली कांग्रेस जस्तो समावेसी र विधिमा चल्ने पार्टी देशमा अरु नभएको दावी गरेका छन् । नेपाली कांग्रेसले महासमिति बैठकबाट पार्टीलाई समावेशी बनाएकाले अब कांग्रेस सशक्त तवरले अघि बढ्ने बताए । सभापति देउवाले दुई तिहाईको सरकारले जनताको हितमा काम गर्न नसकेको आरोप लगाए ।

अहिलेको सरकारले अत्यधिक कर बढाएर जनताको ढाड सकेको उनको दाबी छ । नेपाली कांग्रेस बागलुङले आयोजना गरेको सभामा देउवाले अहिलेको सरकारले जनतालाई उखान टुक्कामा भुलाएको बताए । उनले भने, ‘देश विकासका लागि योजना, क्रियाशिलता र चाहना चाहिन्छ ।’

कांग्रेस प्रवक्ता विश्वप्रकाश शर्माले वर्तमान सरकारका सामु कुनै चुनौती नहुँदा पनि सरकारले काम गर्न नसकेको तर्क गरे । सरकारको नेतृत्व गरिरहेका नेकपा अध्यक्ष केपी शर्मा ओली र सरकारको राष्ट्रवाद सिके राउतको पथमा गएर बिलाएको बताए ।