समाधान संवाददाता

स्वतन्त्र पत्रकार संघ नेपालद्वारा सञ्चालित सामाजिक पत्रकारिता पुरस्कार २०७५ भक्तपुर दधिकोटका अग्रज पत्रकार भैरव रिसाललाई प्रदान गरिने भएको छ । पोखराका समाजसेवी लीलाभक्त आचार्यद्वारा स्थापित उक्त पुरस्कार पहिलो पटक प्रदान गर्न लागिएको हो । ९० वर्षसम्म क्रियाशील रिसाललाई संघको केन्द्रीय समितिको शनिबार बसेको बैठकले प्रतिभा चयन समितिको सिफारिस अनुसार रिसाललाई सम्मान गर्ने निर्णय गरेको हो ।

समितिकै सिफारिसमा धरान सुनसरीबाट प्रकाशित दिव्य रोशनी साप्ताहिककी सम्पादक मनिता राई (चाम्लिङ) लाई पत्रकार महिला सम्मान २०७५ प्रदान गर्ने निर्णय गरेको छ । संघका सल्लाहकार नारायण कार्कीको संयोजकत्वमा गठित ५ सदस्यीय प्रतिभा चयन समितिको बैठकले सर्वसम्मत रुपमा यो निर्णय गरेको हो । समितिका सदस्यमा समाजशास्त्री डा. विश्वकल्याण पराजुली, पत्रकार महिला सम्मानबाट पूर्व सम्मानित पत्रकार दुर्गा अधिकारी, पदेन सदस्य संघका राष्ट्रिय अध्यक्ष कृष्णप्रसाद बास्तोला र महासचिव नवराज पहाडी छन् ।

प्रत्येक वर्ष प्रदान गरिने सामाजिक पत्रकारिता पुरस्कारको राशि २५ हजार रुपैयाँ र सम्मानपत्र तथा पत्रकार महिला सम्मानको राशि ५ हजार रुपैयाँ र सम्मानपत्र छ । यसअघि पत्रकार महिला सम्मानबाट दुर्गा अधिकारी कास्की, शीला गुरुङ पर्वत, रवीना आलेमगर तनहुँ, शान्ति राणा कास्की ईश्वरी पौडेल स्याङ्जा र सीता दर्नाल रुपन्देही सम्मानित भएका थिए ।