तनहुँकाे अर्चलेडाँडाबाट प्याराग्लाइडिङकाे सफल परिक्षण

समाधान संवाददाता २०७५ चैत १० गते १३:०२

कृष्ण न्यौपाने
दमौली

तनहुँको व्यास नगरपालिका ११ तनहुँसुरस्थित अर्चलेडाँडाबाट शबिार प्याराग्लाइडिङको सफल परीक्षण गरिएको छ । यहाँ व्यावसायिक रुपमा प्याराग्लाइडिङ सञ्चालन गर्ने उद्देश्यसहित व्यास नगरपालिकाको सक्रियतामा परीक्षण उडान गरिएको हो ।

पोखराको टिम फाइभ प्याराग्लाइडिङ कम्पनीका राजु आचार्य, शंकर पराजुली र नारायण पराजुलीले प्याराग्लाइडिङ उडान गरेका हुन् । यहाँ विगतमा पनि एकल प्याराग्लाइडिङ उडान गरिएको भए पनि पहिलो पटक डबल उडान परीक्षण गरिएको व्यास नगरपालिका ३ का वडा सदस्य रविन पौडेलले बताए ।

प्याराग्लाइडर राजु आचार्य र शंकर पराजुलीले व्यास नगरपालिका ११ का वडाध्यक्ष निरबहादुर खड्का र स्थानीय विष्णु मास्कीसँग पहिलो उडान भरेका थिए । अर्चलेडाँडाबाट उडान गरिएको प्याराग्लाइडिङको सोही वडाको फराकचौरमा अवतरण गरेको थियो । प्याराग्लाइडिङ गरेपछि वडाध्यक्ष खड्काले निकै रोमाञ्चक अनुभव भएको बताए । उनले भने, ‘पहिलो पटक आकाशमा उड्दासशुरुमा त डर लागे जस्तै भएको थियो । पछि भने निकै रमाइलो लाग्यो ।’

खड्काका अनुसार यस ठाउँबाट व्यावसायिक रुपमा प्याराग्लाइडिङको सम्भावना अध्ययनका लागि परीक्षण गरिएको हो । उनले भने, ‘यस ठाउँमा प्याराग्लाइडिङमार्फत् पर्यटक आकर्षित गराई समग्र यस क्षेत्रकै पर्यटन प्रबद्र्धन गर्ने लक्ष्य राखेका छौं ।’

व्यावसायिक रुपमा प्याराग्लाइडिङका लागि नगरपालिकाले पूर्वाधार निर्माणमा समेत जोड दिने उनले बताए । टिम फाइभ प्याराग्लाइडिङ कम्पनीका राजु आचार्यले यस ठाउँ प्याराग्लाइडिङको लागि उपयुक्त रहेको बताए । पोखरा र बन्दीपुरमा विगत ७ वर्षदेखि प्याराग्लाइडिङ उडान गर्दै आएका उनले यस ठाउँमा व्यावसायिक रुपमा नै प्याराग्लाइडिङ गर्न सकिने सम्भावना रहेको जानकारी दिए ।

तनहुँ सदरमुकाम दमौलीबाट पृथ्वीराजमार्गको घाँसीकुवा ५ किलोमिटर र त्यहाँबाट ३÷४ किमीको दूरीमा अर्चलेडाँडा छ । यहाँका केही घरमा घरबाससमेत सञ्चालन भएको छ । घरबाससँग जोडेर प्याराग्लाइडिङलाई सञ्चालन गर्न सकिए यहाँको विकासमा टेवा पुग्ने स्थानीय सञ्जय श्रेष्ठले बताए ।

तपाईको प्रतिक्रिया