रामकृष्ण लामिछाने
पर्वत

कालीगण्डकी लोकमार्गको पर्वत खण्ड कालोपत्र हुने भएको छ । उक्त सडकखण्ड अन्तर्गत सेतीबेनीदेखि रानीपानीसम्मको ९ किलोमिटर सडक कालोपत्र हुने भएको हो । संघीय सरकारको ४१ करोडको लागतमा उक्त सडक कालोपत्रे हुने भएको हो ।

९ किलोमिटर लामो उक्त सडक जिल्लाको बिहादी गाउँपालिकाभित्र पर्दछ । मिर्मीबाट सुरु हुने यो सडक पर्वतको अर्मादीसम्म ५५ किलोमिटर पर्वत जिल्लाभित्र पर्छ । मिर्मीदेखि मोदीबेनीसम्म सडकको सबै खण्डको ट्रयाक खोलिसकिएको छ ।

पर्वत खण्डमा ४ किमीबाहेक अन्य खण्ड पूरा भइसकेको छ । कालीगण्डकी आयोजना कार्यक्रमका प्रमुख हरिराम दीक्षितले पर्वत खण्डमा ३ वटा खोलामा पुल बन्न लागेको बताए । चिसापानीदेखि हुवास हुँदै बर्राचौर सडक प्रदेश सरकारले कालोपत्र गर्ने गरी ठेक्का आह्वान गरे पनि भुषालचौरदेखि बर्राचौर खण्ड कालोपत्रेमा छुट भएको थियो ।

भुषालचौरदेखि बर्राचौर सडक कालोपत्रेका लागि संघीय सरकारबाट ३ करोड रकम विनियोजन भएको उनले बताए ।