ताराप्रसाद शर्मा
बागलुङ

घरवास (होमस्टे) कार्यक्रम सुरु भएपछि बागलुङको काठेखोला गाउँपालिका ३ धम्जाको ओखलेवासी उत्साहित भएका छन् । गाउँको पर्यटन प्रवद्र्धनमा घरवासले नयाँ आशा जगाएको छ । स्थानीय उत्पादन, संस्कृति र खानपानसहितको सेवा घरवासमा उपलब्ध गराउने योजना गाउँलेको छ । घरवासमा जोडिएका १४ घरमा ४ जनाका दरले पर्यटक राख्न सकिन्छ ।
घरवासका लागि आवश्यक पर्ने पूर्वाधार निर्माणको तयारी भइरहेको बेलढुंगा सामुदायिक घरवासका सञ्चालक समितिका अध्यक्ष टेकबहादुर पुनले बताए । पर्यटनमैत्री हिसाबले कोठा, फर्निचर, शौचालय बन्दै गरेको र छिट्टै विधिवत रुपमा सेवा सुरु हुने तयारीमा रहेको उनको भनाइ छ । होमस्टेमा पारिवारिक वातावरणमा खाना, आवाससँगै पर्यटकले नजिकका पर्यटकीय गन्तव्यस्थल घुम्ने अवसर पाउने छन् ।
स्थानीय उत्पादनलाई पनि घरवाससँग जोडिने घरवास सञ्चालक गोपाल श्रीसले बताए । उनले ओखलेलाई जैविक गाउँ घोषणा गर्ने तयारी रहेको र धम्जाको ओखले आउने पर्यटकलाई स्थानीय खाना खुवाइने सुनाए । यहाँको मुख्य उत्पादन आलु, भाँगो, फापर, मकै र कोदो हुन् । स्थानीय उत्पादन प्रवद्र्धन र बजारीकरणमा पनि घरवासले टेवा पुग्ने विश्वास गरिएको छ ।
समुद्री सतहदेखि २ हजार ३ सय मिटरमा पर्ने ओखले प्राकृतिक हिसाबले पनि मनोरम छ । ओखलेदेखि १ घण्टाको पैदलयात्रामा बेलढुंगा, स्वर्गाश्रमजस्ता पर्यटकीय क्षेत्रमा पुग्न सकिन्छ भने प्राकृतिक दृश्यावलोकन स्तम्भ (भ्युटावर) रुपमा चिनिने बेलढुंगाबाट दर्जनौं हिमशृखला देख्न सकिने वडाध्यक्ष यामबहादुर श्रीसले बताए ।
घरवास सञ्चालकले अनुभव र सिकाइका लागि तालिम, भ्रमणमा जाने योजना पनि बनाएका छन् । पर्यटकलाई आकर्षित गर्न खाना, आवास, सरसफाइ, आतिथ्यता लगायतका सेवालाई स्तरीय बनाउने योजना छ । गाउँमा पर्यटन विकास गर्न सके बसाइँसराइ रोक्न सकिने उल्लेख गर्दै वडा अध्यक्ष श्रीसले पर्यटनलाई उद्यमशीलतासँग जोड्न सके गाउँलेको आर्थिक अवस्था उकास्न सकिने विश्वास गरे ।
ओखलेसँगै काठेखोला गाउँपालिकाका ८ स्थानमा घरवास सुरु भएको छ । वडा नं ७ रेशमा चौर, डोटा देउराली, मौरी झरना र रेश सामुदायिक गरी ४ घरवास सञ्चालनको तयारीमा छन् । वडा नं. ५ बिहुँ, थाम्डाँडामा शिवधुरी, वडा नं. ८ लेखानी र वडा नं ४ तग्रामको फापरखेत, झुलेनीमा सामुदायिक घरवास सुरु भइरहेको छ ।