पोखरा,

चण्डिका आधारभूत विद्यालय मादी ५ बयरघारीले ३३ औं वार्षिकोत्सव शनिबार मनाएको छ । त्यस अवसरमा लायन्स क्लब अफ समर्पणले उक्त विद्यालयका विद्यार्थीलाई वर्षभरलाई पुग्ने शैक्षिक सामग्री हस्तान्तरण ग¥यो ।

विद्यालयका प्रधानाध्यापक जमानबहादुर गुरुङले वार्षिक प्रतिवेदन पेस गरे । मादी गापा उपाध्यक्ष विष्णुमाया आचार्यले विद्यालयमा शौचालय निर्माणका लागि ७ लाख रुपैयाँको योजना परेको जानकारी दिइन् । उनले भविष्यमा पनि आवश्यक सहयोग गर्ने प्रतिबद्धता व्यक्त गरिन् । वर्षभरिका परीक्षा र विभिन्न प्रतियोगितामा उत्कृष्ट भएका विद्यार्थीलाई उक्त अवसरमा पुरस्कार हस्तान्तरण गरिएको थियो ।

कार्यक्रममा मादी ५ का वडाध्यक्ष रतनबहादुर गुरुङ, वडा नम्बर ७ का अध्यक्ष लालबहादुर गुरुङ, लायन्स क्लब पूर्व डिस्ट्रिक गभर्नर योगेन्द्रबहादुर प्रधान, समर्पण लायन्सकी अध्यक्ष मीना लाभाजु, शिक्षकद्वय देवीकुमारी गुरुङ र खिमलाल बास्तोला, विद्यार्थी सरीता नेपाली, लायन जयराज तिमिल्सिना लगायतले बोलेका थिए । विद्यार्थीहरुले सांस्कृतिक कार्यक्रम प्रस्तुत गरेका थिए ।