आर्थिक मामिला तथा योजनामन्त्री किरण गुरुङद्वारा कालीगण्डकी प्राविधिक शिक्षालयको उद्घाटन

समाधान संवाददाता २०७५ चैत २५ गते १२:५६

कृष्ण न्यौपाने
दमौली

प्रत्येक स्थानीय तहमा प्राविधिक शिक्षालय सञ्चालन गर्ने सरकारको घोषणा बमोजिम तनहुँको घिरिङ गाउँपालिका–१ पुट्टारमा स्थापना भएको कालीगण्डकी प्राविधिक शिक्षालयको उद्घाटन गरिएको छ ।

प्राविधिक शिक्षा तथा व्यावसायिक तालिम परिषद् (सिटिइभिटी) मार्फत् मंसिर २ गतेबाट नै पढाइ सुरु भइसकेको उक्त शिक्षालयको शनिबार गण्डकी प्रदेश सरकारका आर्थिक मामिला तथा योजनामन्त्री किरण गुरुङले उद्घाटन गरेका हुन् ।

उक्त अवसरमा बोल्दै मन्त्री गुरुङले दक्ष जनशक्ति भए मात्रै समृद्ध नेपाल निर्माण सम्भव रहेको बताए । मन्त्री गुरुङले दक्ष जनशक्ति भए मात्रै देश विकास सम्भव रहेको उल्लेख गर्दै दक्ष जनशक्ति उत्पादन प्राविधिक शिक्षाबाट हुने बताए ।

मन्त्री गुरुङले परम्परागत शिक्षा प्रणालीले बेरोजगार जनशक्ति मात्रै उत्पादन गर्ने भएकोले अहिलेको प्रमुख आवश्यकता व्यावसायिक शिक्षा भएकोमा जोड दिए । गण्डकी प्रदेश सरकारले प्राविधिक शिक्षालाई महत्व दिएर बजेट समेत विनियोजन गरेको भन्दै मन्त्री गुरुङले प्रदेश सरकारले आफ्नै प्राविधिक विश्वविद्यालय स्थापना गर्ने तयारी गरेको जानकारी दिए ।

कार्यक्रममा पूर्वसचिव शान्तबहादुर श्रेष्ठले १ घर १ प्राविधिक उत्पादन गर्न सकिए कोही पनि बेरोजगार बन्नुनपर्ने बताए । उनले वन विज्ञानको जनशक्तिको देशमा ठूलो माग रहेको भन्दै त्यो मागलाई पूरा गर्न कालीगण्डकी प्राविधिक शिक्षालयले सहयोग पुर्‍याउने बताए ।

घिरिङ गाउँपालिकाका अध्यक्ष रनबहादुर रानाले प्राविधिक शिक्षा सञ्चालनका लागि गाउँपालिकाको तर्फबाट पूर्ण सहयोग रहने बताए । प्राविधिक शिक्षा तथा व्यावसायिक तालिम परिषद् (सिटिइभिटी) का गण्डकी प्रमुख भुवनेश्वर ढुंगानाले औचित्य र मागको आधारमा सीपमूलक पढाई सञ्चालन गर्नुपर्नेमा जोड दिए ।

कालीगण्डकी प्राविधिक शिक्षालयका प्रमुख गोविन्द पौडेलका अनुसार शिक्षालयमा वन विज्ञानको पढाई मङ्सिर २ गतेबाट शुरु भइसकेको छ । ४० कोटा रहेको शिक्षालयमा ३७ जना विद्यार्थी अध्ययनरत छन् । उनका अनुसार शिक्षालयमा जुम्ला, रुकुमु, दार्चुला, बाजुरा, जाजरकोट, सल्यान, हुम्ला लगायतबाट विद्यार्थी अध्ययनका लागि आएका छन् ।

शिक्षालयको हालसम्म आफ्नै भवन नभएकोले सोही वडामा रहेको कृष्ण माध्यमिक विद्यालयको कक्षाकोठामा वन विज्ञानको पढाई हुँदै आएको छ । छिट्टै नै शिक्षालयको आफ्नै भवन निर्माण गर्ने तयारी गरिएको उनले जानकारी दिए ।

उनले भने, ‘अहिलेसम्म शिक्षालयको आफ्नै भवन छैन । वैकल्पिक व्यवस्था गरी पठनपाठन सञ्चालन गरिरहेका छौ ।’ सिटिइभिटी मार्फत् भवन निर्माणका लागि चालु आर्थिक वर्षमा ५० लाख प्राप्त भइसकेको र आगामी दशै अगावै चार कोठे भवन निर्माण गरिने उनले बताए ।

तपाईको प्रतिक्रिया