कृष्ण न्यौपाने
दमौली

दमौलीको सफा सडकको सिद्धार्थ बैंकको शाखा व्यास नगरपालिकाको बहुउद्देश्यीय भवनमा स्थानान्तरण भएको छ । पहिले सञ्चालन भइरहेको स्थान साँघुरो हुँदासेवा प्रवाहमा असहज भएको महसुस भएपछि बैंकले नयाँ ठाउँबाट सेवा दिन लागेको हो ।

शाखाको आइतबार व्यास नगरपालिकाका प्रमुख बैकुण्ठ न्यौपाने र नेपाल उद्योग वाणिज्य महासंघका केन्द्रीय सदस्य देवकुमार श्रेष्ठले संयुक्त रुपमा उद्घाटन गरे । नगर प्रमुख न्यौपानेले निजी क्षेत्रबाट सञ्चालित बैंकको प्रबद्र्धनका लागि नगरपालिका तयार रहेको बताए । उनले बैंकहरुले उत्पादनशील क्षेत्रमा लगानी बढाउनुपर्ने सुझाव दिए ।

बैंकका शाखा प्रबन्धक सुरेश न्यौपानेले नयाँ ठाउँबाट सेवा शुभारम्भ भएको अवसरमा लकर सुविधा सुरु गरेको जानकारी दिए ।सामाजिक उत्तरदायित्व वहन अन्तर्गत स्वास्थ्य, शिक्षा लगायतका क्षेत्रमा बैंकले लगानी गर्ने योजना बनाएको छ ।

नायब प्रमुख कार्यकारी अधिकृत सुन्दरप्रसाद पौडेलका अनुसार २०५८ सालमा स्थापित बैंकका देशभर १ सय ३९ शाखा छन् भने ७ लाख ग्राहक छन् । १ सय १० अर्ब निक्षेप संकलन गरेको बैंकले १ सय २ अर्ब कर्जा प्रवाह गरेको छ ।