प्रहरी विधेयक संशोधन आवश्यकः मन्त्री चुमान

समाधान संवाददाता २०७५ चैत २७ गते १३:२२

समाधान संवाददाता, पोखरा

प्रहरीले सम्पादन गर्ने १ सय ९० वटा संशोधन प्रस्ताव पेस हुँदा केन्द्रीय सरकारले मुख नखोलेकामा मन्त्री हरिबहादुर चुमानले आपत्ति जनाएका छन् ।

गण्डकी प्रदेश सरकारका आन्तरिक मामिला तथा कानुन मन्त्री चुमानले केन्द्रीय सरकारले नेपाल प्रहरी र प्रदेश प्रहरीले सम्पादन गर्ने कामको विषयमा संसदमा पेस गरेको विधेयकलाई संशोधन गर्न माग गरेका हुन् ।

विधेयक जस्ताको तस्तै पास भए प्रदेश र स्थानीय सरकारले कानुन बनाउन नपर्ने भन्दै उनले विधेयक संशोधन गर्न माग गरेका हुन् । विधेयकको विषयमा सरकार मौन बस्नु दुखद् भएको बताए । नेपाल पत्रकार महासंघ गण्डकी प्रदेशले आयोजना गरेको संघीय संरचना र हाम्रो पत्रकारिता विषयक अन्तक्र्रियामा मन्त्री चुमानले केन्द्र सरकारलाई यो विधेयक फिर्ता लिएर संशोधित विधेयक पेस गर्न सुझाव दिए ।

संविधानले नै दिएको अधिकार कटौती गर्ने ढंगले ल्याइएको विधेयक संशोधन वा फिर्ताको विकल्प नरहेको प्रष्टाए । काम गर्दै जाँदा देखिएका अन्योललाई चिर्दै र जनअपेक्षित काम गर्दै प्रदेश सरकारले आफूलाई अगाडि बढाउने उनको भनाई छ ।

नेपाल पत्रकार महासंघका केन्द्रीय सदस्य रामकृष्ण ज्ञवालीले सिंहदरबारको विकृति प्रदेशमा पनि आएको बताए । प्रदेश र स्थानीय सरकारलाई सक्रिय अनि स्थापित गर्न पत्रकारको भूमिका महत्वपूर्ण हुने उनको भनाई छ । पत्रकारिता राजनीतिक आस्थाको छायाँमा परेकाले त्यसबाट माथि उठ्नुपर्ने ज्ञवालीले बताए ।

केन्द्रीय सदस्य ज्ञवालीले लोकतन्त्र स्थापना गर्न भूमिका खेलेका सञ्चारमाध्यमलाई प्रदेश र स्थानीय सरकारले सहि ढंगले बुझ्न नसकेको उनले बताए । प्रदेश र स्थानीय सरकारले केन्द्र सरकारलाई नै उछिनेर प्रेस स्वतन्त्रता संकुचित गर्नेगरी कानुन ल्याएकाले सच्याइनुपर्ने र प्रेस मैत्री बनाइनुपर्नेमा जोड दिए ।

महासंघका पूर्व केन्द्रीय सदस्य रवीन्द्र बास्तोलाले संघीय सरकार र स्थानीय सरकारले गरेका कामबाट आम जनताले राहत पाए भन्ने विषय महत्वपूर्ण हुने बताए । कार्यक्रममा अवधारणा पत्र राख्दै पत्रकार केशवशरण लामिछानेले संघीयता कार्यान्वयनका क्रममा देखिएका जटिलताले पत्रकारलाई पनि सहज नभएको बताए ।

लामिछानेले तहगत सरकारकाबीचमा देखिएका अन्योललाई प्रष्टाउने समाचार लेखिनुपर्ने खाँचो औंल्याए । नेपाल पत्रकार महासंघ गण्डकी प्रदेश समिति अध्यक्ष त्रिभुवन पौडेलको अध्यक्षतामा भएको अन्तक्र्रिया कार्यक्रम महासचिव गणेश पौडेलले सञ्चालन गरेका थिए ।

तपाईको प्रतिक्रिया