५ वर्षमा सबै भूमिहीनलाई लालपुर्जा दिलाउने प्रदेश संसाद काेइरालाकाे दाबी

समाधान संवाददाता २०७५ चैत २७ गते १३:४७

समाधान संवाददाता
पोखरा

गण्डकी प्रदेश सांसद प्रभा कोइरालाले अबको ५ वर्षमा सबै सुकुम्वासीले स्थायी बासका लागि लालपुर्जा भएको जग्गा पाउने दाबी गरेकी छन् । राष्ट्रिय भूमि अधिकार मञ्च कास्कीको आयोजनामा मंगलबार पोखरामा भएको कार्यक्रममा उनले धेरै आन्दोलन गरेर जनताले खोजेको शासन आएको बताइन् ।

अब जुलुस निकाल्ने, टायर बाल्ने जस्ता कुनै पनि सरकार विरोधी कार्यमा लाग्न नपर्ने बताउँदै उनले भूमिहनिलाई सरकारले अधिकार दिने काम गरिरहेको दाबी गरिन् । सरकारलाई सकारात्मक सुझावसहित खबरदारी गर्न आग्रह गर्दै उनले आफ्नो हक अधिकारप्रति सबै जुटेर लाग्न आग्रह गरिन् ।

मञ्चका केन्द्रीय संरक्षक ल्यामबहादुर दर्जी, केन्द्रीय सदस्य आसबहादुर गुरुङ तथा कन्य गुरुङले पोखरा ९ बसपार्क क्षेत्रमा सुन्दर बसपार्क बनाउने प्रचार गर्दै वर्षौदेखि बसोबास गर्दै आएका ६ सय सुकुम्बासी हटाउन पर्छ भन्ने बजारमा हल्ला सुनिएको बताए । नेपाल बार एसोसियनका केन्द्रीय उपाध्यक्ष सुरेन्द्र थापामगरले भूमि अधिकारसम्बन्धी कानुनले कुनै पनि नागरिकलाई बसेको स्थानबाट अन्यत्र सार्न नपाइने व्यवस्था गरेको जानकारी दिए ।

राष्ट्रिय नेपाल भूमिहीन सुकुम्वासी संगठनका कास्की जिल्ला अध्यक्ष लक्ष्मीप्रसाद अधिकारीले आफूहरु विकास विरोधी नभएको तर भ्रमाफियाको चलखेलले बसपार्कबाट सुकुम्बासी हटाउने तर व्यवस्थित गर्ने कुनै योजना नै नभएको जिकिर गरे । कार्यक्रममा अखिल नेपाल सुकुम्बासी संगठनका अध्यक्ष हर्कबहादुर विक, वडा स्तरीय महिला समन्वय समिति पोखरा ९ की संयोजक दिलमाया गुरुङ, मञ्चका अध्यक्ष प्रेमबहादुर गुरुङ, पोखरा नगर अध्यक्ष लेखमाया थापा र कास्की सचिव कुमारी गुरुङले बोलेका थिए ।

तपाईको प्रतिक्रिया