आदिकवि र मिजौरी सदनबीच शैक्षिक सहकार्य

समाधान संवाददाता २०७६ वैशाख ६ गते १२:२७

समाधान संवाददाता, दमौली

तनहुँको दमौलीस्थित आदिकवि भानुभक्त क्याम्पस र अमेरिकाको मिजौरी सदन स्टेट विश्वविद्यालयबीच शैक्षिक सहकार्यका लागि हस्ताक्षर भएको छ । बिहीबार आदिकवि भानुभक्त क्याम्पसमा आयोजित कार्यक्रममा आदिकवि भानुभक्त क्याम्पसका तर्फबाट अध्यक्ष रामचन्द्र बस्नेत र मिजौरी सदन स्टेटका तर्फबाट उपाध्यक्ष ब्राड हडसनले सम्झौतापत्रमा हस्ताक्षर गरेका छन् ।

सम्झौता पश्चात २ वटै शैक्षिक संस्थाका विद्यार्थी तथा प्राध्यापकले शैक्षिक संस्थामा उच्च शिक्षाको अध्ययन, तालिम तथा अनुसन्धान, अध्ययन भ्रमण, गोष्ठी तथा बैठकमा सहभागिता जनाउन पाउने छन् । हस्ताक्षरमा अन्तर्राष्ट्रियस्तरको शिक्षा पद्धतिबारे ज्ञान लिन सहज हुने आदिकवि भानुभक्त क्याम्पसका प्रमुख महाप्रसाद हड्खलेले बताए ।

सम्झौतापत्रमा हस्ताक्षर गरेपछि उक्त विश्वविद्यालयका उपाध्यक्ष ब्राड हडसनले आदिकविसँग सहकार्य गर्न पाउँदा आफूलाई खुशी लागेको बताए । विश्वका १७ देशका विभिन्न क्याम्पससँग विश्वविद्यालयले यसखाले सम्झौता गरेको र नेपालको पहिलो क्याम्पसको रुपमा आदिकविसँग सम्झौता गर्न पाएकामा नयाँ अनुभव भएको बताए ।

‘समुदायबाट सञ्चालित आदिकविसँग सम्झौता गर्न पाउँदा हामीहरुलाई ज्यादै खुशी लागेको छ,’ उनले भने, ‘यो सहकार्य वर्षौवर्षसम्म रहिरहोस् भन्ने चाहन्छौं ।’ उनका अनुसार आदिकविका विद्यार्थीले मिजौरी सदनमा १ सय भन्दा बढि विषयमा अध्ययन गर्न सक्नेछन् । विश्वविद्यालयका डीन माइकेल स्यान्डरस्का अनुसार जर्मनी, स्वीडेन, फ्रान्स, जापान, दक्षिण कोरिया, क्यानडा, मेक्सिको, युक्रेन लगायतका देशका क्याम्पससँग विश्वविद्यालयले सहकार्य गरेका छ ।

सम्झौतापत्रमा हस्ताक्षर गरेपछि दुबै शैक्षिक संस्थाका विद्यार्थी आदानप्रदान र प्राध्यापकबीच अनुभव आदानप्रदान गर्न सहयोग पुगेको उनले बताए । उनले भने, ‘आदिकविका धेरै भन्दा धेरै विद्यार्थी अब यहाँ अध्ययन गर्न सक्नेछन् । त्यसको लागि यो सम्झौता फलदायी हुनेछ ।’ उनका अनुसार उक्त विश्वविद्यालयमा हाल २ जना नेपाली अध्ययनरत छन् ।

आदिकविबाट विश्वविद्यालय अध्ययनका लागि जान चाहने विद्यार्थीका लागि भिषामा सहजताका लागि नेपालस्थित अमेरिकी दूतावाससँग महत्वपूर्ण छलफलसमेत भइसकेको उनले जानकारी गराए । उनले भने, ‘विश्वविद्यालयमा अध्ययनका लागि शुल्क तिर्न सक्ने, अमेरिका नै पढ्न चाहनुको कारण खुलाउन सके भिषा प्रक्रियाका लागि कुनै समस्या हुँदैन ।’ उक्त विश्वविद्यालयमा ४५ देशका ६ हजार विद्यार्थी अध्ययनरत रहेको निर्देशक च्याड स्टेविन्सले जानकारी दिए ।

उनले विभिन्न देशका क्याम्पससँग सम्झौता गर्नु पूर्व अध्ययन गर्ने गरिएको र आदिकवि त्यसमा छनौट हुन सफल भएको बताए । आदिकवि भानुभक्त क्याम्पसका अध्यक्ष रामचन्द्र बस्नेतले विदेशी विश्वविद्यालयसँगको सहकार्य गर्ने अवसरले ‘उत्तम प्राध्यापन सर्वोत्कृष्ट नतिजा’ मूल नारालाई मूर्त रुप दिँद क्याम्पसको शैक्षिक गुणस्तर माथि उकास्न सहयोग पुग्ने बताए ।

विसं २०४३ सालमा स्थापित आदिकवि भानुभक्त क्याम्पसमा २ हजार ५ सय भन्दा बढी विद्यार्थी अध्ययनरत छन् । क्याम्पस प्रमुख हड्खलेका अनुसार तीमध्ये ८० प्रतिशत छात्रा छन् । त्यस्तै १८ प्रतिशत दलित र ७० प्रतिशत विद्यार्थी विपन्न समुदायका छन् । कुल विद्यार्थीमध्ये ९५ प्रतिशत विद्यार्थी ग्रामीण भेगका छन् ।

क्याम्पसले प्रदान गर्ने छात्रवृत्ति र प्राथमिकताका कारण विद्यार्थीहरु क्याम्पसमा अध्ययनका लागि आकर्षित हुने गरेको हड्खलेले बताए ।

तपाईको प्रतिक्रिया