समाधान संवाददाता
पोखरा

नेपाल कम्युनिस्ट पार्टी (नेकपा)का स्थायी समितिका सदस्य तथा गण्डकी प्रदेशका मुख्यमन्त्री पृथ्वीसुब्बा गुरुङले दुईतिहाईको कम्युनिस्ट सरकारले संसदीय क्षेत्रलाई मुख्य थलो मानेर सुधारका कार्यक्रम ल्याउने बताएका छन् । उनले ३ तहको सरकारले नीति तथा कार्यक्रम र कामको केन्द्र प्रष्ट पार्ने बताए ।

नेपाल कम्युनिस्ट पार्टीको ७० औं स्थापना दिवस तथा १ सय ४९ औं लेनिन जयन्तीका अवसरमा नेकपा कास्कीले सोमबार आयोजना गरेको प्रवचन कार्यक्रममा नेता गुरुङले सदनलाई मुख्य थलो बनाएर सुधारको कार्यक्रम अगाडि बढाउने उल्लेख गरे ।

गण्डकी प्रदेश संगठन कमिटीका इन्चार्जसमेत रहेका गुरुङले सत्तारुढ दल आफैं सडकमा जान नमिल्ने भएकाले संघर्षको मुख्य क्षेत्र संसदलाई बनाउनुपर्ने धारणा राखे । उनले प्रतिनिधि तथा राष्ट्रिय सभा, प्रदेश सभा, जिल्ला, नगर र गाउँ सभामा गएर आर्थिक समृद्धि र दिगो विकासको आधार तयार गर्ने बताए ।

राजनीतिक क्रान्ति समाप्त भएपछि समृद्धिको आधार तयार गर्ने चर्चा गर्दै उनले कम्युनिस्ट पार्टीको सरकारले समाज विकास क्रमलाई बुझेर नयाँ लक्ष्य निर्धारण गरी काम गर्ने उल्लेख गरे । क्रान्ति विरोधी पार्टीले संवैधानिक हक नपाउने चिनिया र सोभियत संघको निषेधको मोडलमा जान नसकिने जानकारी दिँदै नेपाली मोडेलमा निषेध गर्न नसकिने उनले बताए । ‘बुर्जुवा शक्तिले भने जस्तो आर्थिक उदारवादमा नगएर नेपालको परिवेश र विशेषतालाई आधार मानेर जनताको जनवादी व्यवस्थालाई अँगाल्नुपर्छ,’ उनले भने ।

नेता गुरुङले व्यक्तिगत तथा राजनीतिक स्वतन्त्रतामा मात्र सीमित नरहेर विपन्न र पछाडि परेको समुदायलाई मूलधारमा ल्याउन सामाजिक न्यायसहितको लोकतन्त्रको वकालत गर्ने उल्लेख गरे । ‘गरिबीको रेखामुनिका २१ प्रतिशत जनतालाई उकास्न नसकेसम्म समृद्धि कायम गर्न सकिन्न,’ उनले भने, ‘उत्पादन र वितरण प्रणालीलाई न्यायोचित बनाइनेछ ।’ काम अनुसारको दामको व्यवस्था गरिनेछ ।’ उनले शोषणरहित समाजको निर्माण गर्ने दाबीसमेत गरे ।

मुख्यमन्त्री गुरुङले भौतिक पूर्वाधारको विकास र निर्माणका कामलाई तीव्रता दिने बताए । विजयको अहंकार लिएर नबसी नयाँ परिस्थितिको सामना गर्न योजनाबद्ध काम गर्ने मुख्यमन्त्रीको भनाइ छ ।

उत्पादनलाई आधुनिक प्रविधिसँग जोड्ने जानकारी दिँदै उनले सरकारले प्रवाह गर्ने सेवा प्रवाहलाई प्रविधि मैत्री बनाउने धारणा राखे । पुराना कानुन र संरचनालाई फेरेर नयाँ कानुन र संरचना बनाएर काम गर्ने जानकारी दिँदै उनले सिर्जनशीलता, मौलिकता र नेपालको विशेषता अनुसार सुधारका कार्यक्रम गर्ने बताए ।

नेता गुरुङले पार्टी र सरकारहरुको अन्तर सम्बन्ध सुधार गर्नुपर्ने धारणा राखे । कम्युनिस्टहरुले धैर्य लिन पर्ने सुझाव दिँदै उनले पिटी बुर्जुवा तथा न्यूनपुँजीवादी उग्रता प्रदर्शन गर्न नहुने उल्लेख गरे । ‘सरकारमा जाने र नजानेको अन्तरद्वन्द्व बढाउने मनोवृत्तिको अन्त्य गर्नुपर्छ,’ उनले भने, ‘सरकारले गरेन भनेर भन्ने बेला आएको छैन । ६ वर्षमा गर्न नसकेको काम ६ महिनामा गर्न सकिन्न ।’

१० लाख पार्टी सदस्य मुखमा स्टिच लागेको महसुस भएको उल्लेख गर्दै उनले सरकारको शाख जोगाउनुपर्ने धारणा राखे । उनले अबको ४ वर्ष ठीक ढंगले काम गर्ने बताए । शक्तिशाली कम्युनिस्ट पार्टी असफल भए कांग्रेसको नाममा फाँसीवाद सुरु हुने संकेत गर्दै उनले भारतको पश्चिम बंगालको कम्युनिस्ट पार्टीले जस्तै भयानक प्रतिगमनको दुर्दशा व्यहोर्न पर्ने उल्लेख गरे ।

ठूलो खड्कोको रुपमा रहेको जिल्ला तहको एकीकरणको अध्याय सकिएको चर्चा गर्दै उनले नगर तथा गाउँ पालिकातहको एकीकरणलाईै सकेर पार्टी एक ढिक्का भएर अगाडि बढ्ने बताए । उनले केन्द्रीय समितिका सदस्यहरुको कार्य विभाजन, पोलिटब्युरोको गठन र जनवर्गीय संगठनको एकीकरणको प्रक्रिया चाँडै सक्ने जनाए ।

पार्टीको स्थापना दिवसलाई परम्परालाई धान्नेभन्दा विगतको समीक्षा गर्नमा केन्द्रित गर्ने बताए । उनले पार्टीको कार्य नीति, रणनीति र संघर्षको बारेमा एउटै धारणा बनाउनेमा ध्यान दिनपर्ने उल्लेख गर्दै उनले वैचारिक एकतालाई सुदृढ बनाउने पर्ने धारणा राखे । कार्यक्रममा नेकपा गण्डकीका अध्यक्ष हितराज पाण्डे, जिल्ला कमिटी कास्कीका अध्यक्ष कृष्ण थापा, सचिव बखानसिंह गुरुङ लगायतले बोलेका थिए ।