समाधान संवाददाता, दुलेगौंडा

निजामती सेवामा आदिवासी जनजातिको पहुँच र सहभागिता बढाउन खैरेनीटारमा लोक सेवा आयोगको तयारी कक्षा सुरु गरेको छ । नेपाल आदिवासी जनजाति प्रतिष्ठान शुक्लागण्डकीको आयोजनामा १५ दिने कक्षा सञ्चालन गरिएको हो । आइतबार कार्यक्रमको उद्घाटन गर्दै शुक्लागण्डकीका नगर उपप्रमुख सविता रसाइलीले तयारी कक्षा बाटो देखाउने मात्र काम भएको बताउँदै विद्यार्थीको कडा मेहेनत भएमा सफल भइने उल्लेख गरिन् ।

राज्य हरेक क्षेत्रमा सबै समुदायको समान सहभागिताका लागि प्रयासरत रहेको जानकारी दिँदै सम्बन्धित समुदायले पनि चासो दिनुपर्नेमा जोड दिइन् । वडा नं. ६ का अध्यक्ष कृष्णबहादुर पौडेलले १५ दिने तालिम आधार मात्र भएको उल्लेख गर्दै उपयोग गर्न आग्रह गरे । वडा ९ का अध्यक्ष लोकनारायण श्रेष्ठले नगरका सबै क्षेत्रबाट सहभागीता गराउन सके कक्षा थप प्रभावकारी हुने बताए ।

शुक्लागण्डकी आदिवासी जनजाति प्रतिष्ठानका खिमबहादुर कुमालले सरकारी सेवामा ठूलो संख्यामा आकर्षण रहेकाले तीब्र प्रतिष्पर्धा रहेको उल्लेख गरे । प्रशिक्षक नगरपालिका सामाजिक विकास शाखा प्रमुख हिमा पोख्रेल, प्रतिष्ठानका सचिव बिमल जिसी लगायतले बोलेका थिए । शुक्लागण्डकी नगरपालिकाको आर्थिक सहयोगमा भएको तालिममा करिव ५० जनाको सहभागिता थियो ।