नगरवासीका गुनासा सुन्न व्यास नगरपालिकाका मेयरको पहल

समाधान संवाददाता २०७६ जेठ १ गते १२:४२

कृष्ण न्यौपाने
दमौली

व्यास नगरपालिकाका प्रमुख वैकुण्ठ न्यौपानले जनताको गुनासा प्रत्यक्ष सुने । नगरवासीका गुनासा, विकास निर्माणमा भएका ढिलासुस्ती र नगरवासीको सुझाव संकलन गर्ने उद्देश्यले नगरपालिकाले प्रत्येक सोमबार १ घaन्टा नगर प्रमुखसँग संवाद कार्यक्रम सुरु गरेको हो । नगरप्रमुख न्यौपानेले गुनासालाई सम्बोधन गर्दै अगाडि बढ्ने प्रतिबद्धता जनाए । उनले भने, ‘स्थानीय तहमा निर्वाचित भएको २ वर्षको अवसरमा यो कार्यक्रम सुरु गरेका हौं, यसले नगरवासीको गुनासो सुन्न र सुझाव सङ्कलन गर्न मार्गदर्शन मिल्नेछ ।’

तनहुँको व्यास नगरपालिकाले सोमबारदेखि सुरु गरेको ‘नगरवासीसँग नगरप्रमुख’ संवाद कार्यक्रममा नगरवासीले एक पछि अर्को गर्दै गुनासा राख्न सुरु गरे ।

व्यास ३ शान्तिनगर टोल विकास संस्थाका अध्यक्ष विनु श्रेष्ठले पक्की नाला निर्माणको क्रममा प्राविधिक नआउँदा अनुगमन हुन नसकेको गुनासो गरिन् । उनले नगर प्रमुख वैकुण्ठ न्यौपानेसँग १ महिनादेखि अनुगमन हुन नसकेको गुनासो सुनाउँदै प्राविधिक पठाइदिन माग गरिन् ।

व्यास २ स्थित श्री टोल विकास संस्थाका अध्यक्ष रुद्रमाया पौडेलले जथाभावी लत्रिएका तारले दुर्घटना बढाएको पटक–पटक वडाध्यक्ष र सदस्यलाई समेत जानकारी गराए पनि कुनै सुनुवाई नभएको गुनासो गुनासो गरिन् । व्यास ४ हरिओम टोल विकास संस्थाका अध्यक्ष हरिशचन्द्र वाग्लेले योजना पूरा भएपछि भुक्तानीका लागि समस्या हुने गरेको गुनासो गरे ।

व्यास २ स्थित जनजागृति टोल विकास संस्थाका अध्यक्ष रामनाथ रिमालले दमौली बजारको चोक–चोकमा विकासको नाममा भएको विनाश रोक्नुपर्ने बताए । व्यास ४ बागबजार टोल विकास संस्थाका अध्यक्ष टीकाराम दाहालले सडक छेउमा जथाभावी पार्किङ गरिँदा दुर्घटना बढेको भन्दै पार्किङको व्यवस्थापनका लागि नगर प्रमुखको ध्यानाकर्षण गराए ।

कार्यक्रमका सहभागीले खानेपानी, ढल, सडकका समस्या सुनाउँदै समस्या समाधानका लागि नगरप्रमुखको ध्यानाकर्षण गराए ।

नगरप्रमुख न्यौपानेले सार्वजनिक सेवालाई अझ गुणस्तरीय, प्रभावकारी एवं सहज र सुलभ गराउँदै प्रतिफलमुखी विकासको अवधारणा एवं जनमुखी प्रशासनको सिद्धान्त बमोजिम भावी लक्ष्यलाई नतिजामुखी बनाउन कार्यक्रमले सहयोग पुग्ने विश्वास व्यक्त गरे ।

उनले समायोजनले प्राविधिक सरुवा भएपछि योजनाको अनुगमनका समस्या भएको जानकारी दिए । संघीय सरकारले कर्मचारी नपठाए आन्तरिक स्रोतबाट भए पनि १ वडा १ प्राविधिक राख्ने विषयमा नगरपालिकाले योजना बनाइरहेको उनको भनाइ थियो ।

नेकपा व्यास नगर कमिटी अध्यक्ष श्रीराम कार्की र नेपाली कांग्रेस तनहुँका सचिव विश्व बास्तोलाले नगरपालिकाले सुरु गरेको संवाद सकारात्मक भएको भन्दै शासनको पारदर्शितामा सघाउने बताए । हरेक सोमबार ११ः३० देखि १२ः३० बजेसम्म नगरवासीसँग नगर प्रमुख संवाद कार्यक्रम सञ्चालन हुनेछ । संवाद कार्यक्रममा नगरपालिकाका उपप्रमुख मीरा जोशी, प्रमुख प्रशासकीय अधिकृत दिनेशराज पन्त, विभिन्न वडाका अध्यक्ष लगायत सहभागी थिए ।

तपाईको प्रतिक्रिया