समाधान संवाददाता, पोखरा

गण्डकी प्रदेशका सांसद मीना गुरुङले साहित्य र चलचित्रकर्मीहरुको लागि सौन्दर्य पनि उत्तिकै आवश्यक भएको बताएकी छन् । गुरुङ फिल्म एसोसिएसन नेपाल (जिफान) को आयोजनामा गण्डकी प्रदेशको सामाजिक विकास मन्त्रालयको आर्थिक सहयोगमा पोखरामा सञ्चालन भएको सौन्दर्य शास्त्र, साहित्य र चलचित्र विषयक गोष्ठीको उद्घाटन गर्दै सांसद गुरुङले साहित्य र चलचित्रकर्मीका लागि सौन्दर्य पनि उत्तिकै आवश्यक भएको बताएकी हुन् ।

देशको कला संस्कृति र मौलिकपनलाई संरक्षण गर्न सबैलाई आग्रह गर्दै सांसद गुरुङले कलाकारलाई व्यावसायिक बनाउनुपर्नेमा जोड दिइन् । वरिष्ठ साहित्यकार राजन मुकारुङले गोष्ठीमा सहजीकरण गरेका थिए । गोष्ठीमा ५५ जनाको सहभागिता रहेको जिफानले जनाएको छ ।

जिफानका अध्यक्ष गिरीप्रसाद गुरुङको अध्यक्षतामा सम्पन्न भएको कार्यक्रममा प्रथम उपाध्यक्ष भोजबहादुर गुरुङ, सल्लाहकार कृष्ण गुरुङ लगायतले बोलेका थिए । कलाकारलाई सशक्तीकरणका लागि उक्त गोष्ठी आयोजना गरिएको अध्यक्ष गुरुङले जनाए ।