समाधान संवाददाता
पर्वत

पैयू गाउँपालिका ६ उपल्लो हुवासका ३६ वर्षीय सोमबहादुर राना १२ तोला सुनसहित पक्राउ परेका छन् । उनलाई इलाका प्रहरी कार्यालय हुवासको टोलीले रानाले चोरी गरेको सुनसहित पक्राउ गरेको हो ।

गत वैशाख ३० गते राति हुवासको आले होटलबाट सुन चोरी भएलगत्तै पीडितले इलाका प्रहरी कार्यालयमा जाहेरी दिएका थिए । प्रहरीले शुक्रबार राति करिब १२ बजे प्रहरी निरीक्षक मित्रबहादुर आचार्यको कमाण्डमा खटिएको टोलीले रानालाई घरबाटै नियन्त्रणमा लिएको थियो ।

रानालाई राति नै इलाका प्रहरी कार्यालयमा लगेर सोधपुछ गर्दा चोरी गरेको स्वीकार गर्दै घरको शौचालयमा सुन लुकाएको बयान दिएका थिए । प्रहरीले बयान पछ्याउँदा रानाले चोरी गरी शौचालयमा लुकाएको ४ तोलाको हार १ वटा, ४ तोलाकै बाला २ ओटा, चन्द्रमा र सिक्री फेला पारेको हो ।

प्रहरीका अनुसार चोरीमा संलग्न रानाले गाउँमा नै मिस्त्री काम गर्थे । चोरी गर्ने राना र बरामद सुनलाई इलाका प्रहरी कार्यालय हुवासले जिल्ला प्रहरी कार्याल पर्वतमा पठाएको छ । जिल्ला प्रहरी कार्यालय पर्वतले रानामाथि थप अनुसन्धान भइरहेको र नियमानुसार कारबाही हुने जनाएको छ ।