समाधान संवाददाता, पोखरा

बाबा फाउन्डेसन पोखराले सामुदायिक विद्यालयमा शैक्षिक सामग्री वितरण अभियान जारी राखेको छ । फाउन्डेसनका अध्यक्ष दीलिपराज श्रेष्ठ र उपाध्यक्ष सरिता ताम्राकारको जन्मदिनको सन्दर्भमा शनिबार विभिन्न १२ वटा सामुदायिक विद्यालयमा अध्ययनरत ६० जना विद्यार्थीलाई शैक्षिक सामग्री वितरण गरिएको फाउन्डेसनले जनाएको छ ।

गरिब तथा जेहेन्दार विद्यार्थीलाई प्रदान गरिँदै आएको शैक्षिक सामग्रीसँगै ‘वातावरणमैत्री र बालमैत्रीका लागि बाबा फाउन्डेसनको अभियान’ नारालाई तीव्रता दिइएको छ । फाउन्डेसनबाट हालसम्म १ हजार १ सय जना विद्यार्थी प्रत्यक्ष लाभान्वित बनेका छन् ।

सरकाले निशुल्क शिक्षाको व्यवस्था गरे पनि शैक्षिक सामग्रीको अभावमा विद्यालय जानबाट वञ्चित विद्यार्थीलाई फाउन्डेसनले ठूलो सहयोग गरेको महतगौंडास्थित जानकी मावि विद्यालय व्यवस्थापन समितिका सदस्य दिलुमाया भण्डारीले जानकारी दिइन् । कार्यक्रममा पोखरा ३ का अध्यक्ष रवीन्द्रबहादुर प्रजुले फाउन्डेसनले शैक्षिक क्षेत्रमा गरेको योगदानको मुक्तकण्ठले प्रशंसा गर्दै शैक्षिक गुणस्तर अभिवृद्धि हुने विश्वास व्यक्त गरेका थिए ।

रोटरी क्लब अफ पोखरा न्युरोडका अध्यक्ष पुष्पकमल पौडेलले विद्यार्थीको शैक्षिक विकासमा सहयोग पुर्‍याउन फाउन्डेसनले चालेको अभियानमा सकारात्मक भएको प्रतिक्रिया दिए ।

फाउन्डेसनले पोखरा महानगरपालिकाभित्रका ३३ वटै वडामा सम्बन्धित वडा कार्यालयको सिफारिसमा १०÷१० जना विद्यार्थीलाई शैक्षिक सामग्री वितरण गर्दै आएको छ । शनिबार मात्र पोखरा महानगरपालिकाका वडा नं १, ३, ९, १४, १७, १९, २६ का विभिन्न सामुदायिक विद्यालयमा अध्ययनरत ६० जना गरिब तथा जेहेन्दार विद्यार्थीलाई शैक्षिक सामग्री वितरण गरिएको थियो ।