मुस्ताङको जोमसोममा सिभिल ईन्जिनीयर कक्षा सुरु

समाधान संवाददाता २०७६ जेठ ५ गते १४:४९

सुन्दरकुमार थकाली
मुस्ताङ

मुस्ताङ सदरमुकाम जोमसोममा पहिलो पटक प्राविधिक बिषयको सिभिल ईन्जिनीयर कक्षा संञ्चालनमा आएको छ । कक्षा संञ्चालन भएसंगै यहाँका बिद्यार्थीहरुको वर्षोदेखि सिभिल ईन्जिनीयर पढ्ने सपना साकार भएको हो ।

जोमसोमको जनहित माध्यमिक बिद्यालयले सिभिल कक्षाका लागि स्थानीय तहमा आवेदन बुझाएपछि स्थानीय तहले शिक्षा बिकास तथा समन्वय ईकाई मार्फत बिद्यालयको आवेदन शिक्षा बिज्ञान तथा प्राविधि मन्त्रालयमा पठाएको थियो । मन्त्रालयले राजपत्रमा सूचना प्रकाशित गरेर ७७ वटै जिल्लामा प्राविधिक विषय कोटाका लागि आहवान गरेको थियो ।

बिज्ञान तथा प्रविधि मन्त्रालयले प्राविधिक बिषयका लागि आह्वान गरेपछि देशभरबाट करिव ३३ सय बढी आवेदन परेका थिए । जसमध्ये मुलुकभर १ सय ७ विद्यालयले प्राविधिक विषयका लागि अनुमति प्राप्त गरेका हुन् । मुस्ताङको ५ स्थानीय तहका विद्यालयले मध्ये घरपझोङको जनहित विद्यालयले मात्र आवेदन बुझाएको शिक्षा विकास तथा समन्वय ईकाई प्रमुख टंकराज बरालले जानकारी दिए ।

उनका अनुसार जिल्लामा १ मात्र विद्यालयले यसपटक प्राविधिक विषयका लागि संञ्चालन गर्न पाउ भनी आवेदन दिएको बताए । जनहित विद्यालयले अनुमति पाएसंगै अब मुस्ताङमा प्राविधिक विद्यालयको संख्या २ पुगेको छ । थासाङ २ कोवाङमा जनआदर्श माविले ५ वर्षअघि कृषि विषयका लागि अनुमति पाएको हो ।

प्राविधिक कक्षा संञ्चालनका लागि अनुमति पाएका विद्यालयलाई सरकारले प्रशिक्षक र सहायक प्रशिक्षक दरबन्दी उपलब्ध गराउने छ भने ल्याब समेतको व्यवस्था गर्ने छ ।जनहित माध्यमिक विद्यालयले पहिलो वर्ष कक्षा ९ बाट सिभिल कक्षा सुरुआत गरेको विद्यालयका प्रधानाध्यापक रामचन्द्र अधिकारीले जानकारी दिए । सिभिल कक्षा १२ पास गरेका विद्याथीले सवईन्जिनीयरको लागि लोक सेवा परीक्षा तथा बिई पढ्न पाउने व्यवस्था भएको उनको भनाई छ ।

सिभिल प्राविधिक विषयको अनुमति पाएको जनहित मावि जोमसोममा यसवर्ष कक्षा ९ मा १७ जना विद्यार्थी छनौट भएका छन् । जसमा छात्र ७ र छात्रा १० जना छन् । सिभिल ईन्जिनीयर विषयका प्रशिक्षक उमेश कडेलले कक्षा ९ को पहिलो कोर्षमा ६ वटा बिषय रहेको बताए ।

उनका अनुसार कम्प्यूटर, निर्माण कन्ट्रक्सन, सर्वे, खानेपानी, सिकर्मी लगायतका विषय छन् । यस्तै कक्षा १० को दोश्रो वर्षमा बिल्डिङ, रोड कन्ट्रक्सन, लागत स्टमेट र डिजाईन संम्वन्धि विषय थपिने छन् । प्रशिक्षक कडेलले विद्यार्थीलाई सिभिल तर्फको पढाईका साथै स्थानीय स्तरको फिल्ड अभ्यास समेत गराईने जानकारी दिए ।

तपाईको प्रतिक्रिया