समाधान संवाददाता, तनहुँ

जिल्ला ट्राफिक कार्यालय तनहुँ र सामाजिक विकास मन्त्रालय पोखराको संयुक्त आयोजनामा यातायात क्षेत्रका मजदुरका लागि सचेतनामूलक कार्यक्रम भएको छ ।

व्यास ४ स्थित एक सभाहलमा भएको कार्यक्रममा २ सय ५० यातायात मजदुरको सहभागिता थियो । सवारी साधन चलाउँदा र यात्रा गर्दा कसरी दुर्घटना हुन जान्छ र यसबाट कसरी बच्न सकिन्छ भन्ने विषयमा सचेत गराइएको थियो ।

सवारी चालक र यातायात व्यवसायीको जिज्ञासामा जिल्ला ट्राफिक प्रहरी कार्यालय तनहुँका प्रमुख पूर्णबहादुर अधिकारीले सडक दुर्घटनाका कारणबाट हुने जनधनको क्षति कहिल्यै पूरा नहुने बताएका थिए ।

उनले यात्रामा सबै सतर्क रहन नसके सवारी चालक र यात्रुहरु दुर्घटनाको सिकार हुने बताउँदै सवारी चालकले मादक पदार्थ सेवन गर्नु, चालक अनुमति पत्र बिना सवारी साधन चलाउनु, साँघुरो २ लेनको बाटो हुनु, सडकमा खाल्टा खुल्टी हुनु, जेब्रा क्रसिङबाट यात्रु नहिड्नु, क्षमता भन्दा बढी भार बोक्नुले यातायात क्षेत्र असुरक्षित हुने बताए ।

कार्यक्रममा तीब्र गतिमा सवारी साधन चलाउनु, सवारी साधन चलाउँदा मोबाइल फोन प्रयोग गर्नु, सिटबेल्ट नलगाउनु, ट्राफिक नियमको पालना नगर्नु नै मुख्य सडक दुर्घटनाका कारण भएको बताए ।

कार्यक्रममा सामाजिक विकास मन्त्रालय गण्डकी प्रदेशका शाखा अधिकृत दामोदर पौडेलले स्वागत गरेका कार्यक्रममा नेपाल यातायात मजदुर संघ गण्डकी प्रदेशका अध्यक्ष किरणबाबु पन्तले होसियारी पूर्वक साधन चलाए समस्या नआउने बताए । पन्तले यातायात क्षेत्रमा लाग्नेलाई समाजमा अझैं नराम्रो नजरले हेर्ने गरेको तथ्य बाहिर आइरहेको भन्दै सबैले मनन् गर्न सके पेसाकर्मीलाई सम्मान हुने धारणा राखे । ट्राफिक प्रहरीले कुनै कुनै समयमा आफू अनुकुल बनाउन खोज्दा यातायात क्षेत्र र मजदुरलाई समस्या आउने गरेको बताए ।