कृष्णहरि भण्डारी
अध्यक्ष, लेखनाथ उद्योग वाणिज्य संघ

लेखनाथसहित आसपासका गाविस गाभेर पोखरा महानगर बनेको २ वर्ष भएको छ । पोखरा देशकै ठूलो महानगर हो । राजधानी काठमाडौंबाट नजिकै रहेको र पर्यटकीय सहर भएकाले यसका आफ्नै विशेषता छन् । पोखरा अहिले जसरी धेरैको आकर्षण छ, त्यसमा थप आकर्षण बनाउने गरी समृद्धिको बाटो बनाउन जरुरी छ । ८ ताल भएको सहर जहाँबाट नजिकै हिमाल हेर्न सकिन्छ ।

गुफा, यहाँको वातावरण पनि आफैंमा मनमोहक छ । महानगर बनेसँगै महानगरमा जनप्रतिनिधिहरु पनि आए । लामो समय कर्मचारीले नै धानेका स्थानीय तहमा जनप्रतिनिधि आएपछि विकास, निर्माण र समृद्धिका काम सुरु भएका छन् । लेखनाथ पनि पोखरा महानगरमै मिसिएपछि हामी पनि महानगरबासी भयौं । महानगरबासी भएपछि हाम्रा धेरै अपेक्षा थिए, ती अपेक्षा पूरा भएका छैनन् । अपेक्षा पूरा नभए पनि महानगरको कार्यप्रणाली व्यवस्थित बन्दै गरेको र कामहरु थालनी भएको अवस्था छ ।

महानगर बनेपछि हाम्रा गुनासा तुरुन्तै सुनिन्छन् भन्ने थियो । जनप्रतिनिधि आएपछि गुनासाहरु चाडै सम्बोधन भइहाल्छन् भन्ने पनि नागरिकको अपेक्षा थियो । पुरानै संरचनामा काम गर्नुपर्दा र नियम, कानुन नहुँदा यो अवधिमा अपेक्षा अनुसारका काम नभएका हुन सक्छन् । यसका बाबजुद पनि लेखनाथबासी महानगरप्रति सकारात्मक नै छन् ।

लेखनाथका किसान, उद्योगी, व्यवसायीको हित र विकासका लागि पनि महानगरसँग सहकार्य भइरहेको छ । तालचोकमा कृषि बजार केन्द्र बन्दै छ । उद्योगी, व्यवसायीको नेताको हैसियतले हामीले यस क्षेत्रको उद्योग, व्यवसाय र समग्र विकासलाई मध्यनजर गर्दा हामी महानगर भएको अनुभूत हुने दिशातिर गइरहेका छौं ।

यहाँ बस्ती विकास भइरहेको छ । खेतीयोग्य जमिनमा पनि परम्परागत खेतीले किसानलाई प्रोत्साहन दिन सक्दैन । आधुनिक र व्यवसायिक खेतीका लागि महानगर, प्रदेश, संघ सरकारसँगै स्थानीयको एकीकृत प्रयासका लागि हामी झक्झक्याइरहेका छौं । स्थानीय सरकार भएकाले यहाँका उद्योग, व्यवसायको अनुगमन गरी राम्रो काम गर्नेलाई पुरस्कार र कानुनविपरीत चलेकालाई कानुनी दायरमा ल्याउन महानगरले भूमिका निर्वाह गर्नुपर्ने देखिएको छ ।

स्मार्ट सहरको अवधारणा लिएको र अन्तर्राष्ट्रिय विमानस्थल पनि बन्दै गरेकाले पोखरा अन्तर्राष्ट्रिय सहर बन्ने निश्चित छ । यसको सोही अनुरुपको विकास, पूर्वाधार निर्माण र नागरिकलाई सहज जीविकोपार्जन र आधारभूत अधिकार दिलाउन महानगरले अगुवाइ गर्नुपर्छ ।