समाधान सम्वाददाता

सरकारले ल्याएको बजेटको प्राथमिकता संसदमा प्रस्तुत गरेपछि छलफल हुने अबको सदन भने नेपाली कांग्रेसले चल्न नदिने भएको छ । सरकारले ल्याएको यसअघिको बजेट कार्यान्वयनमा बेथिति भएको र सांसदलाई सहभागीसमेत नगराइएको भन्दै कांग्रेसका सांसदले असन्तुष्टि जनाएका छन् ।

‘बजेटमा कुनै पनि नाउँमा अबण्डा वा एकमुष्ट रकम नराखियोस् । यदि पुन पोके बजेटको पुनरावृत्ति भएमासशक्त विरोध गछौं,’ कांग्रेस संसदीय दलका नेता कृष्णचन्द्र नेपालीले भने, ‘अबको बैठकमा यसबारे सम्बोधन गरिएन र सुध्रिन्छौं भनिएन भने संसद अवरोध हुन्छ ।’

होमस्टे कार्र्यक्रम, मोडल फामजस्ता कार्यक्रममा न्यूनमात्रामा लगानी गरिएको उनको भनाइ छ । होमस्टे सञ्चालन गर्ने वातावरण बनाउनुको साटो घर, कोठा, ट्वाइलेटका पूर्वाधार पूरा गरेकालाई सडक, सामुदायिक भवन आदिमा खर्च गर्न भनी अनुदान दिइएकोप्रति पोखरेलले असन्तुष्टि पोखे ।

‘मोडेल फार्मको नाउँमा कनिका छरियो । आस्थाका आधारमा ठूला फर्मलाई मोटो रकम दिइयो भने अस्तित्वनै नभएको फर्मलाई आस्थाको आधारमा रकम बाँडियो,’ नेपालीले भने, ‘मन्त्रालयबाट बजेट (पोके) विनियोजन गर्दा विधि र प्रक्रिया उल्लंघन गर्दै अन्यायपूर्ण तरिकाबाट वितरण गरियो ।

यसबारे सदनलाई चित्त बुझ्दो जवाफ नदिएसम्म अन्य प्रक्रिया अगाडि नबढाइयोस् ।’ इन्जोय जोनको डिपिआरका लागि ९ करोड विनियोजन गरिएको कुरा पर्यटन मन्त्रीले सार्वजनिक गरेपछि कांग्रेसले त्यसमा आपत्ति जनाएको छ ।