दलसिंको आरन चलिरह्यो, जीविका चलेन

समाधान संवाददाता २०७६ जेठ २० गते ८:४९

कृष्ण न्यौपाने

तनहुँको भानु नगरपालिका ५ मैवलका दलसिं विक आरन पेसा संकटमा परेपछि चिन्तित छन् ।

पुख्र्यौली पेसाको रुपमा आरनबाट परिवार पाल्न नसक्ने स्थिति आएपछि विक चिन्तित बनेका हुन् । पुर्खादेखि गर्दै आएको आरन पेसाले परिवार पाल्न गाह्रो भएपछि उनी पेसाबाट नै विस्थापित हुने अवस्थामा पुगेका छन् ।

लामो समयदेखि हसिया, खुर्पा, बन्चरो बनाएर परिवार पाल्दै आएका विकले बजारमा आएको आधुनिक सामग्रीका कारण आफ्नो पेसा संकटमा परेको जानकारी दिए । उनले भने, ‘बजारमा आधुनिक हातहतियार र भाँडाकुडा भित्रिने क्रम बढेसँगै पेसा नै संकटमा पर्न थालेको छ । आजभोलि काम पनि पाउन छाडियो ।’ बजारमा भित्रिएका आधुनिक सामानका कारणले आफूले बनाउँदै आएको हँसिया, खुर्पा लगायत बिक्री हुन छाडेको उनको गुनासो छ ।

उनले भने, ‘विगतमा यही पेसाबाटै राम्रोसँग घरखर्च चलिरहेको थियो । तर, अहिले सामग्री नै बिक्री हुन छाडेपछि दोधारमा परेको छु ।’ फलामलाई आगोमा पगालेर बनाइने सामग्री र बजारमा आयातित सामग्रीको गुणस्तरमा धेरै नै फरक भएता पनि त्यसको महत्व नबुझेर उपभोक्ताले आयातीत सामग्री प्रयोग गर्न थालेको उनको गुनासो छ ।

सस्तो मूल्यमा बिक्री गर्ने उद्देश्यले बजारमा आएका सामग्री र आफूले बनाएको सामग्रीको गुणस्तर धेरै फरक रहेको उनको दाबी छ । ‘तर, मानिसले त्यसको महत्व नबुझेर सस्तोमा सामग्री किन्न थालेका छन्,’ उनले भने ।

विगतमा यही पेसाको माध्यमबाट परिवार पाल्दै आए पनि अबको पुस्ता यो पेसाबाट बाँच्न नसक्ने अवस्थामा पुगेको उनको भनाइ छ । फलामलाई कोइलामा ताप दिएर आकार प्रकार दिएर बनाइने खुर्पा लगायतका औजार बलियो भए पनि समयको परिवर्तनसँगै विस्थापित भएर जाने क्रममा रहेको उनी बताउँछन् ।

यो पेसाबाट मासिक २ हजार पनि कमाउन नसकिने भएपछि जीवनयापनका लागि अब के गर्ने भन्ने चिन्ता थपिएको उनले बताए । उनले भने, ‘विगतमा यही पेसाबाट राम्रो आम्दानी हुन्थ्यो, तर अहिले महिनाको २ हजार पनि कमाई हुँदैन ।’

तपाईको प्रतिक्रिया