लुंखु–हुवास सडक कालोपत्रे हुँदै

समाधान संवाददाता २०७६ जेठ २४ गते १३:००

रामकृष्ण लामिछाने
पर्वत

पर्वतको सदरमुकामदेखि कुस्मा बजारसम्म जोड्ने लुंखु–हुवास सडक कालोपत्रे प्रक्रिया अघि बढेको छ । पर्वतको मध्य क्षेत्रको लाइफलाइन मानिने लुंखुृ—हुवास सडक १५ किमी कालोपत्रे गर्न ग्रामीण सडक सञ्जाल सुधार आयोजना (आरसिआइपी) पर्वतले टेन्डर आह्वान गरेको हो ।

सडक कालोपत्रे गर्न मंसिरमा विस्तृत आयोजना प्रतिवेदन (डिपिआर) तयार भएको भए पनि संघीय मामिला तथा सामान्य प्रशासन मन्त्रालयले बहुवर्षीय ठेक्का प्रक्रिया सुरु गर्न अनुमति दिएपछि ठेक्का सूचना प्रकाशन गरिएको हो ।

‘डिपीआर तयार भए पनि ठेक्का सम्झौता गर्न स्वीकृति नदिँदा अन्योल थियो,’ आयोजनाका कार्यक्रम व्यवस्थापक विजय रानामगरले भने । महाशिला र पैँयु गाउँपालिका जोड्ने २० किमी लामो उक्त सडक कालोपत्रे भएपछि पैँयुका बासिन्दा वर्षायाममा स्याङ्जा, पोखरा भएर कुस्मा आउनुपर्ने बाध्यता हट्नेछ ।

कुश्मादेखि फलेवाससम्मको ६ दशमलव ७ किमी सडक कालोपत्रे भइसकेको छ भने लमायखोलादेखि लुंखुसम्मको १३ किमी सडक कालोपत्रे काम भइरहेको छ । अब लुंखु देउरालीदेखि हुवास सडकखण्ड पनि कालोपत्रे भएपछि कुश्मादेखि सुदूरदक्षिण पर्वतको हुवासलाई पनि कालोपत्रे सडकले जोड्नेछ ।

सडक कालोपत्रे २ वर्षभित्र पूरा हुने बताइएको छ । उक्त सडक खण्डमा पर्ने सेराबेंसी र गेडीखोलामा पक्कीपुलको डिपीआर अन्तिम चरणमा पुगेकाले यसै वर्ष ठेक्का प्रक्रियामा लगिनेछ ।

तपाईको प्रतिक्रिया