एसपी कार्की एक्सनमाः विप्लब माओवादीका केन्द्रिय नेता सहित १८ जना पक्राउ

समाधान संवाददाता २०७६ जेठ २६ गते १४:०६

समाधान सम्वाददाता

कास्की जिल्ला सरुवा भएर आए लगत्तै प्रहरीको आन्तरिक सुधारमा लागेका प्रहरी उपरीक्षक (एसपी) दानबहादुर कार्कीको पहिलो एक्सनमा विप्लव माओवादी परेको छ । उनले खटाएको एलआरपी अर्थात लङ रुट पट्रोलिङ टोलीले केन्द्रिय सचिवालय सदस्य सहित १८ जनालाई गिरफ्तार गरेको छ । एकै ठाउमा यति ठुलो संख्यामा विप्लबका कार्यकर्ता पक्राउ परेको सम्भवत यो नेपाल कै पहिलो घटना हो ।

अन्नपूर्ण गाउँपालिका वडा नम्बर ११ उरी भन्ने गाउबाट शनिबार राती उनीहरुलाई पक्राउ गरिएको हो । स्थानीय आमा समुहको घरमा बैठक बसिरहेको बेलामा कास्की प्रहरीले उनीहरुलाई घेरा हालेको थियो । प्रहरीलको घेराबन्दीमा परेपछि सो समुहले भाग्ने प्रयास समेत नगरेको स्थानीयले बताए ।

पक्राउ पर्नेमा विप्लब माओवादीका केन्द्रिय सचिवालय सदस्य मिलन राई, कास्की सेक्रेटरी जंगबहादुर भण्डारी आक्रोश, क्रान्तिकारी विद्यार्थी संगठन कास्कीका अध्यक्ष काजि गुरुङ लगायत रहेको एसपी कार्कीले पुष्टी गरे । उनीहरु सबैलाई शनिबार राती नै जिल्ला प्रहरी कार्यालय कास्कीमा ल्याइएको र अनुसन्धान भैरहेको छ ।

शनिबार कास्कीको अन्नपूर्ण गाउँपालिका ११ मा विप्लब नेतृत्वको नेकपाको विशेष बैठक छ भन्ने बारे कास्की प्रहरीले अघिल्लो दिनमै थाहा पाइसकेको थियो । सोही सूचनाको आधारमा सिबिलका प्रहरी सहितको एलआरपी खटाइएको कार्कीले जानकारी दिए ।

पक्राउ परेको टोलीबाट केही दस्तावेज बरामद भए पनि हात हतियार भने फेला नपरेको एसपी कार्कीले बताए ।

तपाईको प्रतिक्रिया