गाउँ ब्लक पुर्जा वितरण

समाधान संवाददाता २०७६ जेठ ३१ गते १२:३९

कृष्ण न्यौपाने
दमौली

नापी कार्यालय तनहुँले आँबुखैरेनी गाउँपालिका ४ भाँगेका सर्वसाधारणलाई गाउँ ब्लक पुर्जा वितरण गरेको छ । वर्षौदेखि जोतभोग गर्दै आएका भूमिहीनलाई नापी कार्यालयले गाउँ ब्लक जग्गाको धनी पुर्जा वितरण गरेको हो ।

सर्वसाधारणको सहजतालाई ध्यानमा राखी गाउँमै पुगेर त्यहाँका २७ जनामध्ये २३ जनालाई गाउँ ब्लक जग्गाको जग्गाधनी पुर्जा वितरण गरिएको नापी कार्यालयका प्रमुख कृष्ण आचार्यले जानकारी दिए । ४ जनालाई भने कागजात नमिलेका कारण पुर्जा वितरण गर्न नसकिएको उनले बताए । उनले भने, ‘ग्रामीण भेगका जनतालाई सदरमुकामसम्म आउन नपरोस् भनेर गाउँमै पुगेर पुर्जा वितरण गर्‍याै । ४ जनामध्ये कोही उपस्थिति हुनुभएन, कोहीको भने कागजात नमिलेका कारण वितरण गर्न सकिएन ।’

आचार्यका अनुसार गाउँ ब्लकको जग्गाधनी पुर्जा पाउनेमध्ये धेरैले २ रोपनी जग्गा पाएका छन् भने १ आना, २ आना र ३ आनासम्म पाउने पनि छन् । पुर्जा पाएपछि स्थानीयवासी खुशी भएका छन् । पुर्जा नहुँदा उनीहरु व्यक्तिगत काम, बैंकबाट ऋण लिने, धितो राख्ने, बेचबिखन गर्न, अंशवण्डा गर्नबाट बञ्चित थिए । विसं २०२९ देखि २०३२ सम्म तनहुँमा पहिलो पटक नक्सानाप गरिएको थियो । तत्कालीन समयमा बाक्लो बस्ती बसेको ठाउँ र बस्ती नबसेको ठाउँमा गाउँ ब्लक भनेर एउटै कित्तामा जग्गा नापी गरिएको थियो । एकै ठाउँमा धेरै घरहरु भएका ठाउँमा नापनक्सा हुन छुट भएको थियो । उक्त समयमा ती जग्गामा ब्लक नं लेखिएको थियो । नापी कार्यालयले अहिले त्यही ब्लक नं नापेर भोगको आधारमा पुर्जा वितरण गरेको हो ।

तनहुँमा विसं २०७१ सालदेखि गाउँ ब्लक नाप्न सुरु गरिएको थियो । नापी कार्यालयका अनुसार जिल्लामा साविकका २२ वटा गाविसमा गाउँ ब्लक रहेको छ । गाउँ ब्लक अन्तर्गत रहेका सर्वसाधारणले कार्यालयमा आएर ब्लक पुर्जा बनाउन सक्नेछन् । नापी कार्यालयले आँबुखैरेनी गाउँपालिका ६ हिलेखर्कमा २ महिना अगाडि ३३ जनालाई ब्लक पुर्जा वितरण गरेको थियो ।

तपाईको प्रतिक्रिया