समाधान सम्वाददाता
कास्की प्रहरीले लागु औषधको गिरोह ध्वस्त पार्ने अभियान तिव्र पारेको छ । यसै क्रममा शुक्रबार लागु औषधको गोदाम नै कास्की प्रहरीले फेला पारेको छ । पोखरा–१० रामघाट स्थित एक घरलाई लागु औषधका कारोबारीले गोदाम कै रुपमा प्रयोग गरिरहेको सुचनाका आधारमा छापामार्दा ठुलो परिणाममा लागु औषध फेला परेको जिल्ला प्रहरी कार्यालय कास्कीका एसपी दानबहादुर कार्कीले जानकारी दिएका छन् ।
करिब १३ लाख रुपैया बराबरको लागु औषध बरामद गरेको कास्की प्रहरीले त्यसका विक्रेता मध्येका एक डेभिड तामाङलाई गिरफ्तार गरेको छ । १८ बर्षीय तामाङलाई सोही गोदामबाटै समातिएको हो ।
प्रहरी नायव निरिक्षक सन्तोष सुवेदीको कमाण्डमा खटिएको टोलीले तीन बोरा फेन्सिडिल सहित ठुलो मात्रामा डाइजापाम र नर्फिन फेला पारेको थियो ।
एउटा गल्ली भित्रको टिनको छाप्रोको कुनाको कोठालाई गोदामका रुपमा प्रयोग गरिएके थियो । सोही कोठाबाट लागु औषध विक्री वितरण समेत हुँदै आएको कास्की प्रहरीको दावी छ ।
पक्राउ परेका डेभिडले आफुलाई दाइले फसाएको बताएका छन् । सोही कमाण्ड भित्र बस्ने महिलाहरुका अनु्सार डेभिडको दाइ कहिलेकाही आउने जाने गरेको बताएका छन् । प्रहरीले डेभिडसंग बयान लिन बाँकी रहेकाले सो कारोबारको सञ्जालका बारेमा थप बताउन सकेको छैन ।
दुई दिन अघि पोखराको उत्तमचोकमा लागु औषध कै कारोबारी जोन भन्ने गोविन्द थापालाई गोली प्रहार गरेरै गिरफ्तार गरिएको थियो । घाइते जोनको अहिले पनि उपचार भैरहेको छ ।