थासाङको बजेट २४ करोड ५३ लाख

समाधान संवाददाता २०७६ असार १७ गते ११:२४

समाधान संम्वाददाता, मुस्ताङ

मुस्ताङको थासाङ गाउपालिकाको ५ औ गाउसभा बैठकले आर्थिक वर्ष २०७६÷२०७७ को निती तथा कार्यक्रमसहित २४ करोड ५२ लाख ८२ हजारको अनुमानित बजेट पारित गरेको छ ।

गत असार १० गते देखि जारी गाउसभाको बैठकले आज १६ गते सोमबार नयाँ आर्थिक वर्षको सबै कार्यक्रमलाई अन्तिम रुप दिदै सार्वजनिक गरेको हो । पारित निति तथा कार्यक्रमसहित बजेटको गाउपालिकाकी उपाध्यक्ष बालकुमारी शेरचनले ५ औं गाउसभामा वाचन गरकी थिईन् ।

उपाध्यक्ष शेरचनद्धारा प्रस्तुत गरिएको बजेटमा चालुतर्फ १७ करोड ३२ लाख ६१ हजार र पुजिगततर्फ ७ करोड २० लाख ६१ हजार छ ।जसमध्ये संघीय सरकारतर्फ बिक्तिय समानिकरण ६ करोड ७९ लाख , शसर्त चालु अनुदान ९ करोड ६६ लाख , शसर्त पुजिगत अनुदान ६१ लाख ७४ हजार ,राजश्व बाडफाड ३ करोड ५० लाख छ । यस्तै ,प्रदेश सरकारतर्फ बिक्तिय समानिकरण अनुदान १ करोड १९ लाख ५० हजार , सामाजिक सुरक्षा १ करोड १० लाख ,आन्तरिक राजश्व २५ लाख , शसर्त पुजिगत अनुदान १ करोड ,राजश्व बाडफाड ११ लाख ३२ हजार छ । गाउपालिकाको संन्चित मौज्याद ३० लाख समेत गरी उक्त बजेट सार्वजनिक गरिएको प्रमुख प्रशासकीय अधिकृत बिनोद पौडेलले जानकारी दिए ।

यसपटक प्रस्तुत थासाङको निती तथा कार्यक्रम र बजेटमा व्यवासायिक कृषि र पशुपालन , नदी नियन्त्रण , शिक्षा र स्वास्थ्यक्षेत्रलाई मुख्य प्राथमिकतामा राखिएको छ । बजेटमा व्यवसायिक कृषि तथा पशुपालनतर्फ ६० लाख ५० हजार बिनियोजन गरेको छ । नेपाल सरकारबाट प्राप्त शसर्त अनुदानका कार्यक्रम बाहेक सामाजिक बिकासका कार्यक्रममा १ करोड ५० लाख बजेट बिनियोजन भएको प्रशासकीय अधिकृत पौडेलले बताए । उनका अनुसार सामाजिक बिकास तर्फ बालबिकासका बिद्यार्थीलाई दिवा खर्च १० लाख १४ हजार छुट्याएको हो । यसले गाउ पालिका भित्रका बिद्यालयहरुमा बिद्यार्थी भर्ना दर बृद्धि गर्ने लक्ष्य रहेको छ । गत वर्ष थासाङ गाउपालिका बाढी पहिरोले पीडित बनेको थियो ।

बर्षातको समयमा आएको बाढीले कतिपयका घरखेत र सामाजिक संरचनालाई क्षति पूर्‍याएको थियो । कालिगण्डकी नदी र अन्यखोला किनाराका बस्ती र खेतलाई जोगाउन गाउपालिकाले नदी तटबन्ध निर्माणमा पर्याप्त बजेट बिनियोजन गरेको जनाईएको छ । यस्तै शसर्त अनुदानको रकम बाहेक पुजिगत बजेटबाट खर्च हुने गरी पूर्वाधार निर्माणमा जोड दिएको अधिकृत पौडेलले जनाए । आगामी आर्थिक वर्षका लागि पूर्वाधार बिकास तर्फ ३ करोड ३२ लाख बिनियोजन भएको उनले जानकारी दिए । गाउपालिकाले सामाजिक बिकास तथा जलवायु परिवर्तन अध्ययनका कार्यक्रम समेत ल्याएको जनाईएको छ ।

तपाईको प्रतिक्रिया