जोमसोममा असुरक्षित २ सय केजी मासु नष्ट

समाधान संवाददाता २०७६ असार २७ गते १६:१७

समाधान संम्वाददाता, मुस्ताङ

मुस्ताङको जोमसोममा असुरक्षित रुपमा ढुवानी गरिएको भन्दै प्रहरीले शुक्रबार २ सय केजी बोईलर कुखुराको मासु नियन्त्रणमा लिएको छ ।

पोखराबाट ना ७ ख १४९५ नम्बरको जोमसोम आउने बसको छत माथि राखेर ल्याईएको कुखुराको मासु जोमसोम स्थित काठेपुल नजिक नियन्त्रणमा लिएको जिल्ला प्रहरी कार्यालय मुस्ताङका सूचना अधिकारी प्रहरी निरीक्षक राजेन्द्रप्रसाद रेग्मीले जानकारी दिए । मासु धनी प्रहरी सम्र्पकमा नआएपनि बिलमा उल्लेख भए अनुसार मासु राम तामाङको भएको उनले बताए ।

सूचना अधिकारी रेग्मीका अनुसार मासुजन्य पदार्थ बस र जीप मार्फत ढुवानी गर्दा आईस बक्स जस्ता सुरक्षित भाडोमा राखेर आयात गर्नुपर्ने बताए । ६ वटा चिनीको सेतो बोरामा राखेर ल्याएको उक्त असुरक्षित मासु करिव ६० हजार मुल्यको छ । प्रहरीले असुरक्षित रुपमा ओसार पोसार गरिएको मासुको अनुसन्धान गरेको छ ।

नियन्त्रणमा लिईएको उक्त मासु गाउपालिका , प्रहरी र पत्रकारको रोहबरमा सुरक्षित स्थानमा खाल्डो खनी नष्ट गरिने सूचना अधिकारी रेग्मीले जनाए । मुस्ताङ प्रहरीले २ महिना अघि पनि यस्तै असुरक्षित रुपमा ल्याईएको भन्दै ४ सय केजी बोईलर कुखुराको मासु नियन्त्रणमा लिएको थियो ।

तपाईको प्रतिक्रिया