लेखनाथमा लिफ्टिङ प्रणाली सफल परीक्षण

समाधान संवाददाता २०७६ साउन १४ गते १२:२४

समाधान संवाददाता, पोखरा

लेखनाथ साना सहरी खानेपानी उपभोक्ता संस्थाले पहाडी भेकका उपभोक्तालाई लक्ष्य गरी सञ्चालन गरेको भूमिगत पानीको लिफ्टिङ प्रणाली सोमबार सफल परीक्षण गरिएको छ ।

पोखरा महानगरपालिका वडा नं २६ को भवानी कालिका मावि परिसरमा निर्माण गरिएको छ । बोरिङ पानी लिफ्टिङ गरी वडा नं २६, २७, २८ र ३१ का पहाडी भेकका उपभोक्तालाई खानेपानी सुविधा दिने उद्देश्य राखिएको छ ।

उपभोक्ता समितिका पदाधिकारी, राजनीतिक दलका प्रतिनिधि, कर्मचारी, निर्माण कम्पनी लगायत उपभोक्ताको उपस्थितिमा गरिएको परीक्षणमा प्रति सेकेन्ड १० लिटरका दरले पानी तान्न सफल भएको उपभोक्ता समिति अध्यक्ष विष्णुप्रसाद बरालले जानकारी दिए ।

नेपाल सरकारको ७० प्रतिशत र उपभोक्ताको ३० प्रतिशतको लागत अनुमान अन्तर्गत सहलगानीको पहिलो चरणमा निर्माण गरिएको योजनाको कुल लागत २८ करोड छ । योजनाबाट करिब १ हजार ७ सय घरधुरीका ६ हजार उपभोक्ता लाभान्वित हुने बताइएको छ ।

योजना अन्तर्गत भवानी कालिका मावि परिसरबाट लिफ्ट गरिएको पानी विभिन्न ३ ठाउँबाट लिफ्टिङ गरी वडा नं २६ को उच्च भाग नरेसपुरको मुल टंकीमा जम्मा गरी अन्य ४ वटा टंकीबाट उपभोक्ताको घर घरका धारामा पुर्‍याउने लक्ष्य राखिएको छ ।

योजनाको निर्माण कार्य अन्तिम चरणमा पुगेकाले साउनभित्र परीक्षणको काम सम्पन्न गरी असोज महिनासम्ममा उपभोक्ताको घरमा पानी पुर्‍याउने गरी काम भइरहेकोे उपभोक्ता समितिका सचिव मुरारी शर्माले जानकारी दिए ।

तपाईको प्रतिक्रिया