भारतीय सद्गुरुले गरे गुरुस्याङ्वो गुफामा ध्यान

समाधान संवाददाता २०७६ साउन २६ गते १५:२६

मुस्ताङको थासाङ २ कालोपानी नाउरिकोट र गुरुस्याङ्वो गुफामा ध्यान योग गर्न जादा सद्गुरु जग्गी वासुदेवसहित उनको टोली । फोटोः ईन्द्रसिंह शेरचन

एसके थकाली, मुस्ताङ

गत मंलवार आफ्ना सहकर्मी ४९ शिष्यसहित मुस्ताङको थसाङ गाउँपालिका लेते आएका दक्षिण भारतका चर्चित आध्यात्मिक गुरु सद्गुरु जग्गी वासुदेव अहिले कोवाङको नाउरिकोटमा छन् ।

शनिवार नाउरिकोटबाट सिधै सिम्रिक एयरको हलिकप्टर चढेर धार्मिक स्थल गुरुस्याङवो गुफामा पुगेका उनले गुफाभित्र बसेर एक घण्टा ध्यान योग गरेको कर्णाली ट्रेकिङका प्रतिनिधि टंक दुवाडीले जानकारी दिए । जग्गी वासुदेव सहित ४–५ जनाको टोली गुफा पुगेको हो । अरु भने पैदलयात्रा गर्दै गुफा पुगि नाउरिकोट फर्किएका छन् । जग्गी वासुदेव सहित शिष्यहरुले गुफा नजिकको झरनामा स्नान समेत गरेको दुवाडीको भनाई छ ।

यसअघि जग्गी वासुदेवको टोलीले थासाङको टिटि लेकको समेत अवलोकन गरेको छ । त्यहाँको मनोरम प्राकृतिक सौन्दर्यता संग वासुदेवको टोलीले स्वर्गिय आनन्दको महशुस गरेको हो । थासाङका तालतलैया, नदी, खर्क र धौलागिरी आईसफलको छत्रछायामा सदगुरुको टोलीले आध्यात्मिक योग साधना र योग अध्यास गरेको अर्का ट्रेकिङ गाईड ईन्द्रसिह शेरचनले जानकारी दिए ।

भारतीय सद्गुरु मुस्ताङ आएको शनिवार ५ औ दिन पुगेको छ ।अग्ला कदका जग्गी वासुदेवले सेता दारी पालेका छन् । उनी आफ्ना शिष्यसहित कैलाश मानसरोवर जाने क्रममा हिमालपारी मुस्ताङ आएका हुन् । जग्गी सद्गुरु वासुदेव विश्वभर योग दर्शन र अभ्यासमा काम गर्ने इशा फाउन्डेसनक संस्थापक हुन् । जिल्ला प्रहरी कार्यालयका मुस्ताङका प्रहरी प्रमुख तुलबहादुर कार्कीले सद्गुरु वासुदेवको मुस्ताङ भ्रमण नितान्त आध्यात्मिक मात्र भएको यसअघि जानकारी दिएका थिए । सुन्दर हिमाली वातावरण अवलोकन गर्ने, शिष्यहरुलाई ध्यान र योग गराउने मुल उद्देश्यले मुस्ताङ आएको प्रहरीलाई टोलीले जानकारी गराइएको थियो ।

सद्गुरुको भ्रमण टोलीमा अमेरिका, चीन, लेबनान र भारतका शिष्य सहभागी रहेको प्रहरीले जानकारी गराएको थियो । सद्गुरु वासुदेव ६१ वर्षका छन् । सद्गुरुलाई भारत सरकारले सन् २०१७ मा आध्यात्मिक क्षेत्रमा र्पुयाएको योगदानबापत् पद्म विभूषणद्वारा विभुषित गरेको थियो । उनले विश्वका उत्कृष्ट विश्वविद्यालय अक्सफोर्ड, हार्वर्ड, स्ट्यान्फोर्ड, एमआईटी लगायतमा आध्यात्मिक प्रवचन दिइसकेका छन् । सद्गुरुले ’इनर इन्जिनीयररिङ’ कार्यक्रम समेत सञ्चालन गर्छन् ।

सन् १९७५ मा भारतको कर्नाटक राज्यको मैसूरमा जन्मिएका जग्गी वासुदेव ११ वर्षकै उमेरदेखि योगसाधानामा लागेका थिए । सद्गुरुले लेखेका कयौँ चर्चित पुस्तकहरू पनि छन् । उनका ८ भाषामा १०० भन्दा बढी पुस्तक लेखेका छन् ।

तपाईको प्रतिक्रिया