दर्ता एक, व्यवसाय अनेक

समाधान संवाददाता २०७६ भदौ ३ गते १२:२३

सुशील सुवेदी
वालिङ

पसलमा सामान किन्न जाने उपभोक्ताले त्यहाँ के सामान पाइन्छ भनी पहिला बोर्ड हेर्छन्, बाँकी कुरा र सामानबारे पसलमा गएर बुझ्छन् । तर स्याङ्जा, वालिङका अधिकांश पसलले दर्ता एउटा प्रकृतिको व्यवसाय गरी अर्कै व्यवसाय गरेका छन् । बजार अनुगमन गर्दा अधिकांश पसल एक ठाउँमा दर्ता गर्ने र अर्काे ठाउँमा व्यापार गर्ने गरेको पाइएको छ ।

चाडपर्वको समयमा कालोबजारी, मूल्यवृद्धि, म्याद गुज्रेका वस्तुको बिक्री जस्ता समस्या निराकरण गर्न वालिङ उद्योग वाणिज्य संघले गरेको अनुगमनमा व्यापारीले पालना गर्नुपर्ने न्यूनतम मापदण्डका बारेमा सचेत गराइएको छ । वालिङका ७ सयभन्दा बढी पसलमा अनुगमन गरिएको संघका अध्यक्ष शोभकान्त पौडेलले बताए । उनले भने, ‘व्यापारीलाई नियमको पालना गराउँदै सक्षम र पारदर्शी बनाउन अनुगमन गरेका हौं ।’ दैनिक उपभोग्य वस्तुको मूल्यमा एकरुपता ल्याउन पनि यस्ता अभियानले सघाउने उनले बताए ।

व्यापारीहरु सरकारले ल्याएको नयाँ कर नीतिको बारेमा जानकार नभएका समस्या परेको पौडेलले बताए । बेला बेलामा कर नीति र व्यापारीका समस्या समाधान गर्न परामर्शदाता उद्योगा वाणिज्य संघले राख्ने र निशुल्क सेवा प्रदान गर्ने लक्ष्य लिइएको छ । पौडेलले भने, ‘उद्योग वाणिज्य संघ व्यापारीको हकहित चाहने संगठन हो । व्यापारीलाई परामर्श दिनु र राज्यको नियमअनुसार कारोबार गर्न प्रेरित गर्नु हाम्रो कर्तव्य हो ।’

उपभोक्ता पनि सचेत बन्नुपर्ने वडाध्यक्ष आनन्द पाठकले बताए । नियम विपरीत सञ्चालन भएका पसल, म्याद गुज्रेका वस्तु, समान खरिद बिक्री गर्दा अनिवार्य बिल जस्ता बिषयमा उपभोक्ता र व्यापारी दुवैले कर्तव्य निर्वाह गर्नुपर्ने उनको भनाइ छ । एक प्रकृतिको पसल दर्ता गर्ने र सोही दर्तामा अनेक व्यापार गर्नु कानुन विपरीत भएको अनुगमनका क्रममा प्रकाश पारिएको थियो । संघले बजार श्रेत्रलाई ५ भागमा विभाजन गर्दै ५ वटा समूहमार्फत अनुगमन गरेको महासचिब केशरबहादुर खाँणले जानकारी दिए ।

अधिकांश पसलमा मूल्यसूची भेटिएन । बिषादीयुक्त फलफूल, तरकारीलाई निषेध गर्ने उद्देश्यले गण्डकी प्रदेश सरकारले बिषादी परीक्षण प्रयोगशाला चेक जाँच गर्ने कार्यालय पाल्पा र स्याङ्जाको सिमानामा रहेको गल्याङ १ मालुंगामा स्थापना गरेको छ । तर कर्मचारी अभावमा उक्त कार्यालय प्रभावकारी बन्न सकेको छैन ।

तपाईको प्रतिक्रिया