समाधान संवाददाता
मुस्ताङ

वारागुङ मुक्तिक्षेत्र गाउँपालिकाको छुसाङस्थित मुस्ताङ गेटको कालीगण्डकी मोटरेबल पुल सोमबारदेखि सञ्चालनमा आएको छ । पुलको कालीगण्डकी करिडोर, स्थानीय जनप्रतिनिधि र मुस्ताङ प्रशासनको रोहबरमा पुल उद्घाटन गरिएको हो ।

यसअघि नै उद्घाटन गर्ने भनिएको पुल कालीगण्डकी नदी कटानका कारण स्थगित भएको थियो । बाढीले निर्माणाधीन पुलको आरसिसी पुल जोड्ने एप्रोज माटो फिलिङ गरिएको ट्र्याकमा क्षति पुर्‍याएको थियो ।

बाढीले क्षति पु¥याएको संरचना ३ वटा डोजर परिचालन गरी १२ दिनमा पुलको दुईतर्फी ट्र्याक खोलिएको करिडोर सडक आयोजना प्रमुख मुकुन्द अधिकारीले जानकारी दिए ।

उपल्लो मुस्ताङ जोड्ने कालीगण्डकी पुल सञ्चालनमा आएपछि कोरला नाका र उपल्लो मुस्ताङ जाने सवारी साधनलाई सहज भएको पर्यटक सवारी चालक दिप राईले बताए । पक्की पुल बनेकाले अब बाह्रै महिना निर्वाध सवारी साधन उपल्लो मुस्ताङ जानसक्ने बताए ।

मुस्ताङ गेटको पुल र लुप्रापान्डा खोला पुल सञ्चालनमा आए पनि कागबेनीमा निर्माणधीन २५ मिटर लामो पुल निर्माणमा ढिलाइ भएको छ ।

मुस्ताङ गेटमा सञ्चालनमा आएको पक्की पुलको काम लोकल रोड ब्रिज प्रोग्राम एलआरबिपिले २०७१ सालमा सुरु गरेको हो । ४ करोड ७३ लाख लागत रहेको उक्त पुलको लम्बाइ ७६ मिटर छ ।