राजन उपाध्याय
दुलेगौंडा

म्याग्दे गाउँपालिकाले घर भाडामा लिएर कार्यालय सञ्चालन गरेको छ । प्रमुख प्रशासनिक कार्यालय, विषयगत कार्यालयको शाखा र वडा कार्यालयसमेत भाडाको घरबाट सञ्चालन हुँदै आएका छन् । गाउँपालिका केन्द्रबारे विवाद हुँदा कार्यालय बनाउनेबारे निर्णय हुन सकेको छैन । हाल गाउँपालिका केन्द्र म्याग्दे ४, छाङमा छ ।

यसअघि बस्दै आएको घर साँघुरो भएपछि हाल गाउँपालिकाले नयाँ घर भाडामा लिएको छ । गाउँपालिका सञ्चालनका लागि ३ वटा घर भाडामा प्रयोग भइरहेको छ । कार्यालयका लागि मासिक करिब ६० हजार रुपैयाँ घरभाडा खर्च हुने गरेको प्रमुख प्रशासकीय अधिकृत दयाराम तिवारीले बताए । उनका अनुसार केन्द्र र वडा सञ्चालनका लागि करिब ९० हजार रुपैयाँ बुझाउनुपर्ने हुन्छ ।

७ वटा वडा रहेको गाउँपालिकामा वडा नम्बर २ बाहेक सबै कार्यालय भाडाका घरमा छन् । वडा नम्बर २ जामुनेको तत्कालीन गाविस भवनलाई हाल वडाले प्रयोग गरेको हो । गाउँपालिकाले चालु आर्थिक वर्षमा १ र ५ नम्बरको वडा भवन बनाउन लागेको छ । यसका लागि ५०÷५० लाख रुपैयाँ विनियोजन गरिएको गाउँपालिका अध्यक्ष रानाले जानकारी दिइन् । बाँकी ३, ४, ६ र ७ नम्बरको वडा कार्यालय बनाउन जग्गा व्यवस्थापनका लागि रकम छुट्याइएको छ । उनका अनुसार ४ वटा वडा कार्यालयका लागि जग्गा व्यवस्थापन गर्न प्रत्येक वडालाई १० देखि १२ लाख रुपैयाँ विनियोजन गरिएको छ ।

वडा नम्बर ५ का अध्यक्ष शिवबहादुर आलेले आफ्नै भवन नहुँदा सेवा सञ्चालनमा समेत कठिनाइ भएको बताए । ‘३ वटा कोठा लिएर काम भइरहेको छ, प्रशस्त ठाउँ नहुँदा सेवाग्राही आउँदा बस्ने ठाउँसमेत हुँदैन ।’

भवन निर्माण स्थलमै विवाद उत्पन्न हुँदा गाउँपालिका भवन निर्माणका लागि अघि बढ्न नसकेको गाउँपालिकाले जनाएको छ । ‘केन्द्रका लागि २÷३ ठाउँमा पहिचान भएको छ, ‘गाउँपालिका अध्यक्ष रानाले भनिन्, ‘निर्णय भइसकेको छैन ।’ उनले केन्द्रमा सहमति भए विशेष गाउँ सभा बोलाएर निर्णय गर्न सकिने बताइन् ।

त्यसो त गाउँपालिकामा स्थापनाकालदेखि नै केन्द्र विवाद कायमै छ । अध्यक्षसहित पश्चिम भाग छाङ र मनपाङका जनप्रतिनिधि थर्पु बजार नजिकै केन्द्र बनाउनुपर्ने पक्षमा छन् । तर उपाध्यक्ष बालकृष्ण घिमिरेसहित जामुने क्षेत्रका प्रतिनिधि भने बेल्टारी क्षेत्रमा संरचना बनाउनुपर्ने पक्षमा छन् ।

निर्वाचनपछि केन्द्र तोक्ने प्रयास गरिएको थियो । तर विरोधकै कारण सफल हुन सकेको थिएन । गाउँपालिका उपाध्यक्ष घिमिरे पक्षले समथर ठाउँ र धेरै खुला जमीन भएकाले बेल्टारी क्षेत्रमा केन्द्र कायम गरिनुपर्ने माग गर्दै आएका छन् । तर साविक छाङ र मनपाङ क्षेत्रका स्थानीय भने थर्पुमै केन्द्र कायम भएमा सबैलाई पायक पर्ने र त्यहीं नै ठाउँ उपलब्ध भएको तर्क गर्छन् ।

स्थानीय तह लागु भएपछि साविकका गाविसहरु छाङ, जामुने र मनपाङलाई समायोजन गरी गाउँँपालिका गठन गरिएको हो । म्याग्देको क्षेत्रफल १ सय १५ वर्ग किलोमिटर छ । २०६८ सालको जनगणना अनुसार ५ हजार ६ सय २८ घरधुरीमा कुल जनसंख्या २२ हजार ५ सय २ रहेको छ ।