समाधान संवाददाता, दाङ

जिल्ला प्रहरी कार्यालय दाङले राजपुरको जंगल क्षेत्रबाट विप्लवका दाइसहित नेता पक्राउ पर्दा बरामद भएका हात हतियार र नगद रकमबारे जानकारी गराएको छ ।

विप्लवका सहोदर दाजुसहित २१ जना नेता कार्यकर्ता पक्राउ पर्दा उनीहरुको साथबाट २ थान अमेरिकन पेस्तोल र ४ थान कटुवा पेस्तोल बरामद भएको जिल्ला प्रहरी प्रमुख जनक भट्टराईले जानकारी दिए । २/२ राउन्ड गोली लोड गरिएको मेडइन यूएसए लेखिएका दुई थान पेस्तोल, कटुवा पेस्तोल ४ थान र ३०३ राइफलको गोली ५ राउन्ड बरामद भएको एसपी भट्टराईले बताए ।

त्यस्तै सुतली बम एक थान र ३ लाख ८४ हजार ५ सय ३० रुपैयाँ नगद, ३६ थान मोबाइल बरामद भएको प्रहरीले जानकारी दिएको छ ।

केन्द्रीय कमिटीको आठौं पूर्ण बैठकको राजनीतिक महत्वपूर्ण प्रस्ताव लेखिएको दस्तावेज समेत बरामद भएको जिल्ला प्रहरी प्रबक्ता विनोद विक्रम शाहले बताए ।

त्यसैगरी दिपराज शेरपाईली नाममा ग्लोवल आईएमी बैंकको २ थान चेक तथा तिलकबहादुर गुरुङ र दिपराज शेरपाईलीको संयुक्त नाममा ग्लोबल आइएमइ बैंकको चेक २ थान बरामद भएको प्रहरीले जनाएको छ ।

आर्थिक सहयोग लेखिएको ३० थान लेटर प्याड, नेकपाको छाप १ थान, विप्लव राजनीतिक दर्शनका किताव १३ थान, विभिन्न डायरीहरु १६ थान र २१ थान झोला बरामद भएको प्रहरीले बताएको छ ।

पक्राउ परेका सबै नेता कार्यकर्ता विरुद्ध दाङ प्रहरीले संगठित अपराध तथा राज्य विरुद्धको अपराधमा मुद्दा दर्ता गरी अनुसन्धान सुरु गरिएको प्रबक्ता शाहले जानकारी दिए ।