प्रहरी इन्चार्जलाई बलात्कार आरोप

समाधान संवाददाता २०७६ कार्तिक ३ गते १३:५०

समाधान संवाददाता
सुनसरी

नागरिकको जिउ ज्यानको सुरक्षा दिने प्रहरीमाथि नै एकल महिलामाथि बलात्कार गरेको आरोप लागेको छ । सुनसरीको धरान उपमहानगरपालिका ४, पत्रङबारी प्रहरी चौकीका इन्चार्ज प्रहरी सहायक निरीक्षक पीताम्बर अधिकारीमाथि स्थानीय एकल महिलाले बलात्कारको आरोप लगाएकी हुन् ।

पीडित महिलाले शनिबार इलाका प्रहरी कार्यालय धरानमा किटानी जाहेरी दिएपछि अधिकारीलाई पक्राउ गरिएको छ । शनिबार नै धरान ४ का वडा सदस्य धनबहादुर कुलुङसहित इलाका प्रहरी कार्यालय धरानबाट घटनास्थल गई प्रहरीले मुचुल्का तयार गरेको छ ।

पतिको मृत्युपछि ती महिला ४ छोराछोरीसहित पत्रङबारीस्थित घरमा बस्दै आएकी छन् । मादक पदार्थले मातेका प्रहरी सहायक निरीक्षक अधिकारीले गएको बुधबार मध्यरातमा आफ्नो घरमा प्रवेश गरी आफूलाई बलात्कार गरेको ती महिलाले प्रहरी समक्ष बयान दिएकी छन् ।

ती महिलाको उजुरी दर्ता गरी प्रहरी सहायक निरीक्षक अधिकारीलाई पक्राउ गरिएको र घटनाबारे अनुसन्धान थालिएको सुनसरीका प्रहरी प्रमुख एसपी यज्ञविनोद पोखरेलले बताए ।

तपाईको प्रतिक्रिया