समाधान संवाददाता, काठमाडाैं

प्रहरीले नक्कली नोट छाप्ने उपकरणसहित तीन जनालाई सोमबार बिहान राजधानीबाट पक्राउ गरेको छ ।

महानगरीय प्रहरी वृत्त बौद्धको टोलीले गोकर्णेश्वर नगरपालिका-६ नयाँबस्तीबाट उपकरण, केही नक्कली नोटसहित तीन जनालाई पक्राउ गरेको हो ।

पक्राउ पर्नेमा दोलखा मेलुङ्गा नगरपालिका-७ घर भई गोकर्णेश्वर- ६ बस्ने २६ वर्षीय राजन परियार, ३५ वर्षीय सन्तोष नेपाली र २१ वर्षीय महेन्द्र नेपाली छन् ।

वृत्तका प्रहरी निरीक्षक प्रदीप पौडेलका अनुसार उनीहरूको साथबाट एक हजारको ३४ थान नक्कली नोट बरामद भएका छन् । पैसा बनाउने ठूलो कागज १४२ थान, सानो १४९ थान बरामद भएको छ ।

यस्तै, रंगीन मेसिन, सिपियु, मनिटर, हिटर, क्यामरा, कैंची, गम लगायत बरामद भएको पौडेलले जानकारी दिए ।

उनीहरूले आफू बस्ने गरेको घरमा उपकरण राखेर नक्कली नोट छाप्ने गरेको पौडेलले जानकारी दिए ।

प्रारम्भिक अनुसन्धान अनुसार उनीहरूले दसैंमा ४० हजार रुपैयाँ नक्कली नोट बजारमा पुर्‍याइसकेको खुलेको छ ।

उनीहरू बस्ने घरको तेस्रो तलामा नोट छाप्ने कारखाना नै तयार पारेको पौडेलले जानकारी दिए ।

नक्कली नोट छाप्ने गरेको गोप्य सूचना पाएपछि वृत्तको टोलीले सोमबार बिहान छापा मारेको थियो ।