एसके थकाली, जोमसोम

मुस्ताङबाट निर्वाचित संघीय सांसद प्रेमप्रसाद तुलाचनको पहल स्वरुप जोमसोम–पोखरा हवाई उडानमा स्थानीय तथा राष्ट्र सेवक कर्मचारीलाई टिकट आरक्षणको व्यवस्था मिलाईएको छ। यसका लागि सांसद तुलाचन र एअरलाईन्स कम्पनीसंग भएको सहमतीपछि जोमसोम–पोखरा दैनिक उडानमा ४ वटा सहुलियत टिकटको आरक्षण भएको सांसद तुलाचनले जानकारी दिए ।

तारा एअरलाईन्स कम्पनीले जोमसोम देखि पोखराका लागि अब दैनिक तेश्रो उडानमा नियमित स्थानीय बासिन्दा र यहा कार्यरत कर्मचारीलाई २ वटा टिकट आरक्षणको व्यवस्था मिलाउन पत्राचार समेत गरेको हो । कम्पनीले गत असोज १० गते टिकट आरक्षण व्यवस्था कार्यान्वयन गराउन सांसद तुलाचनको नाममा पत्रचार गरेको थियो । एअरलाईन्सको पत्रमा उडान भर्ने दिनको अघिल्लो दिन दिउसो २ बजे सम्ममा स्थानीय तथा कर्मचारी यात्रुको जानकारी दिनुपर्ने उल्लेख गरेको छ ।

यस्तै , सुमिट एअरलाईन्स कम्पनीले पनि जोमसोम–पोखरा दैनिक दोश्रो हवाई उडानमा स्थानीयबासी र यहा कार्यरत कर्मचारीलाई २ वटा सहुलियत हवाई टिकटको व्यवस्था मिलाउने जनाएको छ । सांसद तुलाचनको नामा सुमिट एअरलाईन्सले लेखेको पत्रमा यात्रु जानकारीका लागि अघिल्लो दिनको दिउसो २ बजे जानकारी गराउनु पर्ने जनाएको छ । एअरलाईन्स संग भएको सम्झौता संगै अब जोमसोम–पोखरा हवाई उडानमा स्थानीय र कर्मचारीलाई ४ वटा सहुलित टिकटको व्यवस्था भएको सांसद प्रेमप्रसाद तुलाचनले जानकारी दिए ।

सांसद भौगोलिक विकटता भएको मुस्ताङ जिल्लामा बसोबास गर्ने स्थानीय बासिन्दा र यहा कार्यरत कर्मचारीहरुको मर्म र भावना अनुरुप हवाई सुविधाका लागि पहल गरेको बताए । उनले प्राप्त सुविधाबाट स्थानीय र कर्मचारी लाभान्वित हुने दावी गरे । एअरलाईन्सको सहुलियत हवाई टिकट आरक्षण व्यवस्था गराउन संम्वन्धित दुबै कम्पनीका जोमसोम शाखा, जोमसोम नागरिक उड्डयन र स्थानीय प्रशासनलाई समेत पत्राचार गरेको मुस्ताङका प्रमुख जिल्ला अधिकारी वेदप्रसाद अर्यालले जानकारी दिए । उनले सम्झौता कार्यान्वयन भएको नभएको नागरिक उड्डयन र प्रशासनले अनुगमन गर्ने बताए ।

धार्मिक तथा पर्यटकीय जिल्ला मुस्ताङमा तारा र सुमिट एअरलाईन्स गरी २ वटा निजी कम्पनीले उडान भर्दै आईरहेका छन् भने नेपाल वायु सेवा निगमले सेवा प्रवाह गर्न सकेको छैन । मुस्ताङ भ्रमण तथा राउन्ड अन्नपूर्ण गर्ने विदेशी पर्यटकले हवाई सेवा प्रयोग गर्ने गरेका छन् । निजी एअरलाईन्सले विदेशी पर्यटकका लागि १ सय २५ अमेरीकी डलर र भारतिय पर्यटकका लागि ५ हजार भारु हवाई भाडा तोकेको छ । एअरलाईन्सले नेपालीका लागि २ थरीको टिकट उपलब्ध गराउने गरेको छ । जसमा सहुलियत नेपाली हवाई भाडादर ३ हजार ६० र अर्को ४६ सय रुपैया तोकेको छ ।

विदेशी, भारतिय र नेपालीबीचको समान हवाई भाडा दर नभएकाले नेपाली हवाई यात्रु टिकट प्राप्त गर्न बञ्चित हुनु परेको थियो । टिकट आरक्षण पछि नेपाली यात्रु, स्थानीय र कर्मचारीलाई राहत पुगेको हो । यस्तै सहुलियत हवाई सेवाले आकस्मिक उपचारका लागि समेत सजिलो भएको छ । जोमसोम–पोखरा १ सय ६० किमी र कच्ची सडक भएको र हवाई सेवामा टिकटको व्यवस्था नहुदा उपचारका लागि स्थानीयले सास्ती भोग्दै आईरहेका थिए ।